ସ୍ମୃତି ସେ' ଦିନର
ସ୍ମୃତି ସେ' ଦିନର
ତୁମେ ଆଜି ମନେପଡ଼ ସାଥୀ
ଜୀବନର ଏଇ ଅପରାହ୍ନେ
ତୁମସାଥେ ହୋଇଥିଲା ଦେଖା
କେଉଁ ଏକ ଗୋଧୂଳି ଲଗନେ ।
ସଙ୍ଗେଥିଲେ ସାଥୀ ସହଚରୀ
ଓଠେ ଥିଲା ଧାରେ ସରୁ ହସ
ଦେହେ ଥିଲା ଭିଜିଲା ବସନ
କଟିଦେଶେ ମାଟିର କଳସ ।
ଧୀରେଧୀରେ ଚାଲୁଥିଲ ପଥ
ଚାହୁଁଥିଲ କଣେଇ କଣେଇ
ପବନେ ଉଡ଼ି ଚୂର୍ଣ୍ଣ କୁନ୍ତଳ
ଆଖି ଓଠ ଯାଉଥିଲା ଛୁଇଁ ।
ମନେପଡ଼େ ସେ'ଦିନର ସ୍ମୃତି
ଯାହା କିଛି ଆସିଥିଲି ଛାଡି
ଯଦିଥାନ୍ତା ମୋର ଦୁଇ ଡେଣା
ତୁମ ପାଶେ ଯାଇଥାନ୍ତି ଉଡ଼ି ।