ସ୍ମୃତି ସେ ଦିନର

ସ୍ମୃତିର ସହର ଜନଗହଳିରେ

ହଜିଯାଏ ମୋର ଗାଆଁ, 

ଶୀତ ତାପ ଘରେ ଦରମରା ହୁଏ

ଫୁଙ୍ଗୁଳା ଝରକା ବାଆ

ଟିସୁ ପେପରରେ ବନ୍ଦୀ ହୁଏ ହାୟ

ଅଇଁଠା ମୁହଁ ଓ ହାତ, 

ପୋଛିବାକୁ ନାହିଁ ବୁଢୀ ମା'ର କାନି           

ମାଆର ପ୍ରିୟ ପଣତ

ପକ୍ଷୀର କାକଳି ଚୋରା ଚଇତାଳି

ପଉଷ କାକର ବିନ୍ଦୁ, 

ଅଶିଣ ଆକାଶ ଶ୍ରାବଣର ଧାରା

କୁଆଁର ପୁନେଇଁ ଇନ୍ଦୁ

ଏ ସବୁ ତ ଆଜି ସପନ ହୋଇଛି

ସ୍ମୃତିର ସହରେ ମୋର, 

ମନ ମୋର ଗାଆଁ ଗଙ୍ଗଶିଉଳିଟେ

ଦେହ ଦୂଷିତ ସହର

ସ୍ମୃତି ତୁମେ ମୋର ବିଗତ ପ୍ରିୟାର        

ବୃନ୍ଦାବତୀ ସଞ୍ଜ ଦୀପ, 

ଚୁନା ଚୁନା ହସ ଦୁଃଖ ଅବଶୋଷ

ଅକୁହା ମନର ପାପ