ସମ୍ପର୍କର ନଈ ତୀରେ

ଅତୀତର କିଛି ପୃଷ୍ଠା ମେଲେଇଲେ

କେତେ କଥା ପଡେ ମନେ,

ଫୁଲ ଫୁଟିଗଲା ଅତର ବାସିଲା

ମୋ ମନ ଚନ୍ଦନ ବନେ l

ସ୍ମୃତି ସବୁ ଆଜି ମହୁ ଛିଟା ପରି

ଜୀବନରେ ଭରେ ମଧୁ,

ଆଖି ଦିନେ ମୋର ସ୍ୱପ୍ନ ଦେଖିଥିଲା

କେବେ ହେବି ତୁମ ବଧୂ ।

ସ୍ୱପ୍ନ ଅସୁମାରୀ ମଧେ ବିଭାବରୀ

କେଉଁଠି ହଜିଲା ସିଏ

ସରଗର ଚାନ୍ଦ ଏ ଶୂନ୍ୟ ଅମ୍ବରେ

ଲୁଚିଗଲା କାହିଁ ହାଏ ।

ସ୍ୱପ୍ନ ସବୁ ମୋର ଅମା ଅନ୍ଧକାର

କେଉଁଠି ଯାଇଛି ହଜି,

ଜିତିବା ହାରିବା ପ୍ରୟାସ ମଧ୍ୟରେ

ଜୀବନ ଲାଗିଛି ବାଜି l

ଦେହ ମନ ସବୁ ଯନ୍ତ୍ରଣାରେ ପୂର୍ଣ୍ଣ

ଭାବି ବସେ ପଛଦିନ,

ବିଶ୍ୱାସ ଆଜି ମୋ ବଇରୀ ସାଜିଛି

ନେବାକୁ ଚାହେଁ ଜୀବନ l

ଜୀବନ ଯମୁନା କରେ ଆନମନା

ଆଉ ମୁଁ ପାରୁନି ଲେଖି,

ଏତିକିରେ କ୍ଳେଶ ସମାପ୍ତ ହୋଇନି

ଆହୁରି ଅନେକ ବାକି l

ଲେଖି ବସିଲେ ମୁଁ କାହାଣୀ ହୋଇବ

କବିତାରେ କିବା ସରେ,

ଭାବିଦେଲେ ଆମ ଅତୀତର ବ୍ୟଥା

ନିତି ଜିଇଁ ନିତି ମରେ l