ସମ୍ପର୍କ

ବିଧାତା ଗଢ଼ଇ ସଂସାରେ ସମ୍ପର୍କ

ହୃଦ ଅବା ରକତର

ମନୁଷ୍ୟ ଖେଳୁଛି ଖେଳଣା ପରାଏ

ମହତ୍ତ୍ୱକୁ ଭୁଲି ତା'ର ।

ଆଜିର ସମାଜେ ସମ୍ପର୍କର ମୂଲ୍ୟ

ବୁଝେନାହିଁ ଏ ମଣିଷ

ଅଲୋଡ଼ା ସାଜିଛି ହୃଦୟେ ସମ୍ପର୍କ

ଭରିଛି ସ୍ୱାର୍ଥର ବିଷ ।

ରକତ ବି ଏଠି ପର ହୋଇଯାଏ

ଭୁଲିଯାଏ ସମ୍ପର୍କକୁ

ହୃଦୟର ଭାବ କିଏ ବା ବୁଝିବ

ସାକ୍ଷୀ ରଖି ସମୟକୁ ।

ଧନ ସମ୍ପଦରେ ବଳିୟାର ଯିଏ

ସମ୍ପର୍କ ତା' ପାଇଁ ତୁଚ୍ଛ

ଗର୍ବ ଅହଂକାର ତାହାରି ଆତ୍ମୀୟ

ସଭିଙ୍କୁ ଭାବଇ ନିଚ୍ଚ ।

ନିର୍ଦ୍ଧନର ପାଶ ନ ଆସନ୍ତି କେହି

ସମ୍ପର୍କ ପଡଇ ଫିକା

ବାଟଭାଙ୍ଗି ଚାଲି ଯାଆନ୍ତି ସକଳେ

ଭାବ ଏଠି କିଣାବିକା ।

ସ୍ୱାର୍ଥର ଆଳରେ ସମ୍ପର୍କ ସୁନ୍ଦର

ବୁଝିବା ସହଜ ନୁହେଁ

ବିଷକୁମ୍ଭ ମଧ୍ୟେ ଅମୃତ କଣିକା

ମିଠା କଥା ଖାଲି ମୁହେଁ ।

ତ୍ୟାଗ ବଳିଦାନ ସମ୍ପର୍କର ମାନ

ହଜିଲାଣି ହୃଦୟରୁ

ସମ୍ପର୍କ ତିଷ୍ଠିବା ନିମନ୍ତେ ସାଧନା

ଅମୂଳକ ଜୀବନରୁ ।

ହିଂସା, ଅତ୍ୟାଚାର ବିସ୍ତାରୁଛି କାୟା

ସମ୍ପର୍କ ହରାଇ ସ୍ଥିତି

ଦିଗହରା ହୋଇ ମଣିଷ ଖୋଜୁଛି

ଜୀବନେ ତାହାର ଶାନ୍ତି ।

ସୁଦୃଢ଼ ସଶକ୍ତ ସମ୍ପର୍କର ରଜ୍ଜୁ

ଖଣ୍ଡ ବିଖଣ୍ଡିତ ହୋଇ

ତଥାପି ଆଶାୟୀ ଛିଣ୍ଡିଯିବ ନାହିଁ

କେତେ ଝଡଝଞ୍ଜା ସହି ।

ସ୍ନେହଶ୍ରଦ୍ଧା ପ୍ରେମ ଲୋକଦେଖାଣିଆ

ହୋଇଲାଣି ସମାଜରେ

ସମ୍ପର୍କର ସଂଜ୍ଞା ବଦଳି ଗଲାଣି

ସ୍ୱାର୍ଥପର ଦୁନିଆରେ ।

ସମାଜ ହାଟରେ ମୂଳଚାଲ ହୁଏ

ସମ୍ପର୍କର ସୂକ୍ଷ୍ମତତ୍ତ୍ୱ

ତଥାପି ସମ୍ପର୍କ ତିଷ୍ଠିଛି ସଂସାରେ

ମହତ୍ତ୍ୱ ବଖାଣି ନିତ୍ୟ ।