ସମ୍ପର୍କ

ସମ୍ପର୍କର ଜଉ ମୁଦା ଲଫାପାରେ ତୁମେ ,

ତୁମେ ନୀଳ ଆକାଶର ଅବ୍ୟକ୍ତ ପରିଭାଷା

ହେମନ୍ତର ଶୀତଳତା

କେବେ ଅବୁଝା କବିତା !

ସମ୍ପର୍କ ଗୋଟେ ଲୋଟଣୀ ପାରା ପରି ଘୁମୁରୁଥାଏ

ମୋ ଚେତନାର ଚୌହଦୀରେ

କେବେ ସୋରିଷ ଫୁଲର ହଳଦୀ ମଖା

ତୁମ ଅଳସ ଦେହରେ ତ ,

କେବେ କୁହୁଡି ଘେରା

ଅଦୃଶ୍ୟ ମାନ ଇସାରାରେ

ସମ୍ପର୍କ ତମ ମୋ ଭିତରେ  !

ଏବେ କୁହ

ତୁମେ ଅମାବାସ୍ୟାର ଅରୁନ୍ଧତୀ ତାରା

ନା ମନ ଉପକୂଳର ଦିଗବାରେଣୀ ,

କେମିତି ଅବୁଝା ଏ ସମ୍ପର୍କ

କାୟା ନଥାଇ ମାୟା

ଛାୟା ନ ଥାଇ କାୟା

ବଡ ଅଦ୍ଭୁତ ଏ ସମ୍ପର୍କ !