ବାଜୁନି ମହୁରୀବାଜୁନି ବାଜା
ବାଜୁନି ମହୁରୀବାଜୁନି ବାଜା
ନିର୍ମଳ ଶରତ ନିର୍ମଳ ଜଗତ
ମାଆଙ୍କର ଆବାହନ
ଅଶରିରୀ ପାଇଁ ପୂଜା ଜମୁନାହିଁ
ବୁଝୁନି ସନ୍ତାନ ମନ ।
ବାଜୁନି ମହୁରୀ ବାଜୁନାହିଁ ବାଜା
ହୋଇନାହିଁ ସାଜ୍ଜସଜ୍ଜା
ବିନା ଆଡମ୍ବରେ ଗମ୍ଭୀରା ଭିତରେ
ପାଉଛନ୍ତି ମାଆ ପୂଜା ।
ଦୀପ ଜାଳିଦେଲେ ମାଆ ଙ୍କ ପାଖରେ
ଉଣାହୁଏ ପାପତାପ
ଅନୁମତି ନାହିଁ ଏସନ ମଣ୍ଡପେ
ଜାଳିବାକୁ ଆମେ ଦୀପ ।
ସନ୍ଧ୍ୟାରେ ଭଜନ ହେଉନି କୀର୍ତ୍ତନ
ଦର୍ଶନ ପାଇଁ କି ମନା
ନନା ଗାଉଛନ୍ତି ମାଆ ଙ୍କ ବନ୍ଦନା
ଶୁଣୁଛନ୍ତି ସେଇ ନନା ।
ପୂଜା ପାଇଁ କାହିଁ ନାହିଁତ ଗହଳୀ
ସବୁଆଡେ ଖାଲି ଭୟ
ସଭିଙ୍କୁ ତ ବାଦ କରେ ଅବସାଦ
ଅନ୍ତରେ ଅକୁହା କୋହ ।
କବି କଳାକାର ଶିଳ୍ପୀ କାରିଗର
ବସିଛନ୍ତି ହାତବାନ୍ଧି
ପୂଜା ବଜାରରେ ନାହିଁ ରୋଜଗାର
ଦିନ ସରେ କାନ୍ଦିକାନ୍ଦି ।
ଉଠା ଦୋକାନୀଙ୍କ କର୍ମ ହେଲା ବାଙ୍କ
ବସି ନାହିଁ ମେଳା କାହିଁ
ମଉଳିଲା ଆଶା ବୁଡିଲା ବେଉସା
ଦୁଃଖ ବୁଝନ୍ତିନି କେହି ।
ପୂଜା ଭରିଦିଏ ସବୁ ଓଠେ ହସ
ଏସନ ପାରୁନୁ ହସି
କିଏବା କହିବ କେବେତ ପାହିବ
ତମସା ଭରା ଏ ନିଶି ।
କରୁଣାମୟୀଗୋ ତୁମ ଚରଣରେ
ସଭିଏଁ କରୁଛୁ ଅଳି
କରୋନା ଦାଉରୁ ରକ୍ଷା କର ମାଆ
କରୋନାକୁ ପାଦେ ଦଳି ।