ଅସମତା

ପାଞ୍ଚ ଟଙ୍କିଆ ପାଉଁରୁଟି ପାଇଁ

କିଏ ଲାତ ବିଧା ଖାଏ

ତ କିଏ ଚୋର ଆଖ୍ୟା ପାଏ ;

ଆଉ କିଏ ହଜାରେ ଟଙ୍କାର ଖାଦ୍ୟ

ଅଯଥାରେ ଫିଙ୍ଗିଦିଏ ।

ଲୁଗା ଖଣ୍ଡିଏ ନାହିଁ ବୋଲି

କିଏ ସାତସିଆଁ ଲୁଗାକୁ 

ଦେହରେ ଗୁଡେ଼ଇ ଦିଏ

ତ କିଏ ପର ପାଖେ ହାତ ପତାଏ,

ଆଉ କିଏ ଚିରା ଫଟା ପୋଷାକ

ହଜାର ଟଙ୍କା ଦେଇ କିଣି ଥାଏ ।

ଖାଦ୍ୟ ଅଭାବରେ କାହା ପେଟ

ପାତଳକୁ ଲାଗି ଯାଇଥାଏ ତ

ଆଉ କିଏ ପେଟ ବଢ଼ିଗଲା ବୋଲି

ଜିମ୍ ଯାଇ ଝାଳ ବୁହାଏ ।

କାହାକୁ ମାଛ ଭାତ ରୁଚେନି

ତ ଆଉ କାହା ପାଇଁ ତାହା ସାତ ସପନ,

କିଏ ଘରେ ବସି ଲକ୍ଷପତି 

ତ ଆଉ କିଏ ପର ଘରେ ମାଜେ ବାସନ ।

କିଏ ଜହ୍ନ ଦେଖିବାକୁ ଛାତ ଉପରେ ଚଢେ

ତ ଆଉ କିଏ ଘର ଭିତରୁ ହିଁ ଦେଖିପାରେ ।

କାହା ପିଲା ଜନ୍ମଦିନ ପାଳିବ ବୋଲି ସ୍କୁଲ୍ ଯାଏନି

ତ କାହା ପିଲା ଜନ୍ମ ଦିନରେ ଗାଈ ଚରେଇ ଯାଏ ।

କାହିଁକି ଏ ଅସମତା ପ୍ରଭୁ?

ବୋଧହୁଏ ସମସ୍ତଙ୍କୁ ସମାନ କରିଦେଲେ 

ତୁମକୁ ଆଉ କେହି ପଚାରିବେନି।

ସେଥିପାଇଁ ତ ତୁମର ଏ 

ଅସମତା ଯୋଜନା,

ତୁମ ଯୋଜନାକୁ ଅନେକ ଲୋକ

ତୁମ ଲୀଳା ବୋଲି କୁହନ୍ତି ।