ସକାଳ ସଞ୍ଜରେ ଡାକୁଛି ତୁମକୁ
ସକାଳ ସଞ୍ଜରେ ଡାକୁଛି ତୁମକୁ
ମାଆ ମାଆ ବୋଲି ପୁକାରେ ଜଗତ
ମାଆ ଗୋ ଅମୃତମୟୀ
ସାହା ହୁଅ ମାଆ ଜଗତଜନନୀ
କୃପାମୟୀ ବିରଜାଇ
ତେଜୋରୂପା ବ୍ରହ୍ମସୂତା
ଦେବୀ ମାହେଶ୍ୱରୀ ମହିଷ ମର୍ଦ୍ଦିନୀ
ଯାଜପୁରେ ବିରାଜିତା ।
ବୈତରଣୀ କୂଳେ କକୁଦ ମଣ୍ଡପେ
ପ୍ରକାଶ ଦିବ୍ୟ ସ୍ୱରୂପ
ଯଜ୍ଞ ଗାର୍ହପତ୍ୟେ ହୁଅ ଆବିର୍ଭୂତା
ପ୍ରକଟ ଶକ୍ତି ମହାତ୍ମ
ପ୍ରଶସ୍ତ ମୁକତି ମାର୍ଗ
ପିତୃ ଦେବ ଲୋକ ସୁଗମ୍ୟ ସୁଲଭ
ପୂତ ନାଭିଗୟା କୁଣ୍ଡ ।
ତନ୍ତ୍ର ମନ୍ତ୍ର ବିଦ୍ୟା ପରମ ଆରାଧ୍ୟା
ପ୍ରଣବୀ ବିନ୍ଧ୍ୟ ବାସିନୀ
ଦୁର୍ଗା କାଳୀ ଚଣ୍ଡୀ ଚାମୁଣ୍ଡା ବିରଜା
ଆଦିଶକ୍ତି ସନାତନୀ
ଉଜ୍ଜ୍ୱଳ ଗୁହ୍ୟପାଟକ
ନାଶ ରଜତମ ଦଶ ଅଶ୍ୱମେଧ
ଯଜ୍ଞ ହେଉ ଚରିତାର୍ଥ ।
କପିଳ କଶ୍ୟପ ମହର୍ଷି ଅଗସ୍ତ୍ୟ
ମହାମାୟା ଲୋପାମୁଦ୍ରା
ସ୍ୱାୟମ୍ଭୁବ ମନୁ ସୁଧନ୍ୱ। ଯଯାତି
ସୁସ°ସ୍କୃତି ପରମ୍ପରା
ବୈଦିକ ଆର୍ଯ୍ୟ ଚେତନା
ହେଉ ଉଜାଗର ଉତ୍କଳ କଟକ
ଉଡୁ ସିଂହଧ୍ୱଜ ବାନା ।
ସକାଳ ସଞ୍ଜରେ ଡାକୁଛି ଆକୁଳେ
ଧ୍ୟାୟେ ମାତା ପାଦପଦ୍ମ
ମୃତ୍ୟୁର ଦାନବ ଲଭୁ ପରାଭବ
ଭବାନୀ ଦୂରିତ ଖଣ୍ଡ
ଅମା ଅନ୍ଧକାର ଚିରି
ଶ୍ରୀଦେବୀ ଭୂଦେବୀ ବିଜୟା ବିରଜା
ଆସ ମାଆ ଅବତରୀ ।