ସିନ୍ଦୂର ଗୋ ତୁମେ
ସିନ୍ଦୂର ଗୋ ତୁମେ
ସିନ୍ଦୂର ଗୋ ତୁମେ ଇନ୍ଦୁର ଚମକ
ନବବଧୂର ସିନ୍ଥିରେ
ସମାଜରେ ତାର ପରିଚୟ ତୁମେ
ଆଉ ଏକ ଆରମ୍ଭରେ ।।
ସିନ୍ଦୂର ଗୋ ତୁମେ ମର୍ଯ୍ୟାଦାର ଚିହ୍ନ
ସଧବାର ଶରୀରରେ
ଦାମ୍ପତ୍ୟ ଜୀବନେ ସ୍ୱର୍ଗସୁଖ ତୁମେ
ପ୍ରତିକ୍ଷଣ ମୁହୂର୍ତ୍ତରେ ।।
ସିନ୍ଦୂର ଗୋ ତୁମେ ଆଶାର କିରଣ
ପ୍ରେମିକାର ହୃଦୟରେ
ନିଚ୍ଛକ ପ୍ରେମର ସାକ୍ଷୀ ସାଜି ତୁମେ
ବାନ୍ଧିଦିଅ ବନ୍ଧନରେ ।।
ସିନ୍ଦୂର ଗୋ ତୁମେ ସ୍ୱପ୍ନର ନୀଡ଼ଟେ
କୁଆଁରୀର ନୟନରେ
ଶୂନ୍ୟ ଫରୁଆକୁ ପୂର୍ଣ୍ଣକର ତୁମେ
କେବେ ଦିନେ ବାସ୍ତବରେ ।।
ସିନ୍ଦୂର ଗୋ ତୁମେ ଅଭିଶପ୍ତ ଦାଗ
ବିଧବାର ଜୀବନରେ
କଣ୍ଟାର ଆଘାତ ଦେଇଥାଅ ତୁମେ
ଲିଭିଯାଇ ଅବେଳରେ ।।