ସିଧାକଥା-121 :ବନ୍ଧୁତା
ସିଧାକଥା-121 :ବନ୍ଧୁତା
ସବୁ ବୟସରେ ସମସ୍ତଙ୍କୁ କିଛି ପ୍ରିୟ ବନ୍ଧୁ ମିଳିଥାଏ,
ଭାଗ୍ୟବାନ ଏକା ସେହି ବନ୍ଧୁତାକୁ ରଖିପାରେ ଶେଷଯାଏ |
କାହାର ପ୍ରଶଂସା କର ବା ନ କର ଦିଅ ନାହିଁ ଅପମାନ,
କରଜ ପରାଏ ଫେରି ଆସିବ ସେ ଧରି ସୁଧ-ମୂଳ ଧନ |
ବାହାର ଚାପରେ ଅଣ୍ଡା ଫାଟିଗଲେ ଜୀବନରେ ଶେଷହୁଏ,
ଭିତର ଚାପରେ ଫାଟିଲେ ଅଣ୍ଡାଟି ଜୀବନ ଆରମ୍ଭ ହୁଏ |
ସବୁ ବଡ଼କାମ ଆରମ୍ଭ ହୋଇବ ହୃଦୟରେ ଥିଲେ ଧରି,
ବିକଶିତ ହେବ ଜୀବନ ତାହାର ପରିପକ୍ଵ ଅଣ୍ଡା ପରି |
ଅଗମ୍ୟ ପଥକୁ ପାରି ନ ହୋଇ କେ ଆବିଷ୍କାର କରିନାହିଁ,
ପ୍ରତିକୂଳ ପରିବେଶ ପରିସ୍ଥିତି ସଭିଙ୍କୁ ସୁହାଏ ନାହିଁ |
ଅଦମ୍ୟ ସାହସ ଗଭୀର ବିଶ୍ୱାସ ରହିଲେ ସଫଳ ଥୁଆ,
ତାଙ୍କ ତ୍ୟାଗ ନିଷ୍ଠା ଅଭିଯାନ ପାଇଁ ଫିଟେ ବାଟ ନୂଆନୂଆ |