ଶୁଖିଲା ପତ୍ର
ଶୁଖିଲା ପତ୍ର
ଖେଳାବୁଲା ସାରି ସଞ୍ଜ ନହେଉଣୁ
ଘରକୁ ଫେରିଲା କୁନା ଆମର
ଦେଖିଲା ମାଆ ତା' ସାଇତି ରଖୁଛି
ଅଖା ଭର୍ତ୍ତି କରି ଶୁଖିଲା ପତ୍ର ।
ପଚାରିଲା କୁନା ଚକିତ ହୋଇଣ
କାହିଁକି ମାଆ ଲୋ ରଖୁଛୁ ଯତ୍ନେ
କେଉଁ କାମରେ ସେ ଆସିବ କହୁନୁ
ସାଇତିବି ମୁହିଁ ନିଶ୍ଚୟ ଦିନେ ।
ହସିଦେଲେ ମାଆ କୁନାକୁ ଆଉଁସି
ଅଦରକାରୀ ସେ ନୁହେଁ ରେ ଧନ
ଜାଳେଣି ରୂପରେ କାମରେ ଆସିବ
ପାଉଁଶରେ ଥାଏ ସାରର ଗୁଣ ।
ପକ୍ଷୀ ଖୋଜିଥାଏ ଶୁଖିଲା ପତର
ଗଢିବା ନିମନ୍ତେ ତାହାରି ବସା
କେବେ ସାଜିଥାଏ ଅତି ଦରକାରୀ
ଭାସିଯାଉଥିବା ପିମ୍ପୁଡି ଆଶ୍ରା ।
କେତେ ଔଷଧି ଗୁଣ ରହିଅଛି
କେତେକ ଶୁଖିଲା ପତର ଦେହେ
ଖଲି, ଠୋଲା ପାଇଁ ନିହାତି ତ ଲୋଡ଼ା
ରୋଜଗାର ପାଇଁ ସହାୟ ହୁଏ ।
ଖେଳିଗଲା କୁନା ଓଠେ ମିଠା ହସ
କହିଲା ବୋଉଲୋ ବୁଝିଲି ମୁହିଁ
ଆଜିଠାରୁ କେବେ ଶୁଖିଲା ପତର
ଭାବି ଅଣଦେଖା କରିବି ନାହିଁ ।