ଶୁଖିଲା ପତ୍ର

ମୁହିଁ ଯେ ଶୁଖିଲା ପତ୍ରଟିଏ ବୋଲି

ଅଣଚାଶ ପବନରେ ଉଡିଯିବି

ବଢ଼ିଲା ନଈର ସୁଅରେ ଭାସିଯିବି

ନିଆଁର ଡହକରେ ଜଳିଯିବି

ଏହାର କିଛି ସଠିକତା ନାହିଁ!!

ମୁହିଁ ଯେ ଶୁଖିଲା ପତ୍ରଟିଏ ବୋଲି

ଆପେ ଆପେ ଗଛରୁ ଝଡ଼ିଯିବି

ଅପନ୍ତରାରେ ପଡି ପଡି ସଢୁଥିବି

ଆ ମୃତ୍ୟୁ ଅସହାୟତାରେ ଯୁଝୁଥିବି

ତାହାର କୌଣସି ନିର୍ଦ୍ଦିଷ୍ଟତା ନାହିଁ!!

ମୁଁ ଯେ ଆପଣା ଜୀବନର

ତମାମ ଅଭିଜ୍ଞତାରେ ସମୃଦ୍ଧା

ନୁହଁଇ କାହାରି ଆଶ୍ରିତା

ମୁଁ ସ୍ୱୟଂସମ୍ପୂର୍ଣ୍ଣା ସ୍ୱୟଂସିଦ୍ଧା

ଆପଣା ଗୁଣଗ୍ରାମରେ ବନ୍ଦିତା

ଆପଣା ବିଶ୍ବର ବିଜେତା

ବୟସର ସାୟାହ୍ନରେ ହେବି 

କାହିଁ କାହାର ଉପେକ୍ଷିତା??