ଶୁଭୁଛି ରାବ !

କର୍ଣ୍ଣେ ରାବ ଶୁଭୁଛି !

କାଳିଆ କାଳିଆ ପରି ନାମ ଲାଗୁଛି,

କର୍ଣ୍ଣେ ରାବ ଗୁଞ୍ଜୁଛି !!

ସତେ କି ସୁଦୟା,କଲେ ଜଗନ୍ନାଥ

କରିବେ କି ପ୍ରଭୂ, ପୂର୍ଣ୍ଣ ମୋନରଥ !

ମନ ପ୍ରାଣ ମୋର,ଖୁସିଯେ ହେଉଛି

ଅପାର ଆନନ୍ଦ, ମନରେ ଭାସୁଛି !!

କର୍ଣ୍ଣେ ରାବ ଶୁଭୁଛି........

ମନ କୂତୁହଳ, ମସ୍ତିଷ୍କେ ଜାଗ୍ରତ

କାହିଁକି ନ ହେବ,ଠାକୁର ସେହୁତ !!

ନାମ ଶୁଭୁ ଅଛି କର୍ଣ୍ଣରେ ଗୁଞ୍ଜୁଛି 

ନାମ କାଳିଆରେ ମୁଗ୍ଧ ମୁଁ ହେଉଛି!!

କର୍ଣ୍ଣେ ରାବ ଗୁଞ୍ଜୁଛି ............

ଚକାନୟନର, ଚକ୍ରାନ୍ତ ଏ ସାରା,

ଅଦୃଶ୍ୟେ ଶୁଭୁଛି,ନାମ ରତ୍ନ ପରା !

ଜଗା ଆଶୀର୍ବାଦ, ମନଯେ, କହୁଛି,

କେତେ ଭାଗ୍ୟବାନ ମନରେ ଭାବୁଛି !!

କର୍ଣ୍ଣେ ରାବ ଶୁଭୁଛି..........

ଦିଶେ ପୁରୀକ୍ଷେତ୍ର, ନେତ୍ରରେ ମୋହର,

ବାନା ପ୍ରଭୁଙ୍କର,ଉଡ଼େ ଫରଫର !

କଳିଙ୍ଗ ସାଗର,ଚକ୍ଷୁରେ ଦେଖୁଛି,

ମଣିମ ମଣିମା, ହୃଦରେ ଶୁଭୁଛି !!

କର୍ଣ୍ଣେ ରାବ ଶୁଭୁଛି.............

ବିଚ୍ଛିନ୍ନାଞ୍ଚଳରୁ ଦେଖୁଛି ନେତ୍ରରେ,

କାଳିଆ ଠାକୁର,ନଜର ଦେଲେରେ !

ପୁଣି ବଡ଼ଦାଣ୍ଡ,ନେତ୍ରରେ ଦିଶୁଛି,

କାଳିଆର ନାମ ଅନ୍ତରେ ପଡୁଛି !!

କର୍ଣ୍ଣେ ରାବ ଶୁଭୁଛି..........

ଉତ୍କଳ ଏ ଭୂମି,ବିଚ୍ଛିନ୍ନ ହୋଇଛି,

ଭାଷା ଶିକ୍ଷା ନାହିଁ ଦୁର୍ଭାଗ୍ୟ ପଡ଼ିଛି !

ଚକାନୟନହେ ସବୁତ ଦେଖୁଛି,

ଆଶାର କୀରଣ ଜାଗ୍ରତ ହେଉଛି !!

କର୍ଣ୍ଣେ ରାବ ଶୁଭୁଛି.............

ଓଡ଼ିଆ ସମ୍ମାନ ଏଠି କି ମିଳିବ,

ପୂର୍ବର ଗୌରବ,ଫେରି କି ପାଇବ !

ମାତୃଭାଷା ଶିକ୍ଷା, ଚକ୍ଷୁରେ ଦିଶୁଛି,

ଅପୂର୍ବ ଉତ୍ସାହ,କିମ୍ପା ଯେ ହେଉଛି ?

କର୍ଣ୍ଣେ ରାବ ଶୁଭୁଛି............

ମନବାଞ୍ଛା ପୂର୍ଣ୍ଣ,କର ଜଗନ୍ନାଥ,

ଶିକ୍ଷା ମାତୃଭାଷା, ଯୋଡ଼ି ଦିଅ ନାଥ !

ତୋର କରୁଣା କି, ଏଠାରେ ପଡ଼ିବ,

ମନର ବିଶ୍ବାସ, ସତ୍ୟ କି ହୋଇବ !!

କର୍ଣ୍ଣେ ରାବ ଶୁଭୁଛି..............