ଶୁଭକାମନା

ଥାଳିରେ ସଜାଇ ରଙ୍ଗର ଅବିର 

   ଉଇଁଲେ ପୂର୍ଣ୍ଣମୀ ଜହ୍ନ 

ରଙ୍ଗରେ ଭିଜିବ ଦେହ ଓତଃପ୍ରୋତ

   ଜୀବ ତରୁ ଲତା ପ୍ରାଣ ।

ବରଷିବେ ରଙ୍ଗ ସ୍ନେହ ପ୍ରେମ ମଧୁ

   ପ୍ରଭୁ ସୂର୍ଯ୍ୟ ନାରାୟଣ

ଚୋରାଇବ ଚିତ୍ତ ଚଇତି ମଳୟ

   ବୋଳିବ ଫଗୁ ଫଗୁଣ ।

ପତ୍ର ଫଳ ପୁଷ୍ପେ ପଲ୍ଲବି ଉଠିବ

   ସବୁଜ ସୁନ୍ଦର ସ୍ୱପ୍ନ

ଚାଲୁଛି ଚାଲିବ ନୈମିତ୍ତିକ ନିତ୍ୟ

   ଜୀବନର ଜୟଗାନ ।

ସଞ୍ଜୀବିତ ହେଉ ସୁରଭିତ ହେଉ

   ଜୀବନରେ ଭରୁ ରଙ୍ଗ

ଉନ୍ମେଷୁ ସଙ୍କଳ୍ପ ଭାବ ସୁମଙ୍ଗଳ

   ଶାନ୍ତି ମୈତ୍ରୀ ବିଶ୍ଵ ପ୍ରେମ ।

ରଙ୍ଗ ମହୋତ୍ସବ ସମଗ୍ର ବିଶ୍ୱକୁ

   ଜଣାଏ ଶୁଭ କାମନା

ଅନ୍ଧ ଅହଙ୍କାର ନୁହେଁ ସନାତନ

  ମଙ୍ଗଳ କୃଷ୍ଣ ଚେତନା ।

   -------------