ଶୁଭ ଜନ୍ମଦିନ

ବରଷକେ ଥରେ ଆସେ ଜନ୍ମଦିନ

ଖୁସି ଆନନ୍ଦକୁ ନେଇ

ପାଳନ୍ତି ପିଲାଏ ସାଙ୍ଗ ସାଥି ମେଳେ

ବେଶ ପରିପାଟୀ ହୋଇ ।

ସଜାଇ ଘରକୁ ସୁନ୍ଦର ଭାବରେ

ଫୁଲ ରଙ୍ଗ ପଟ୍ଟ ପତ୍ରେ

ସ୍ୱାଦିଷ୍ଟ କେକକୁ କାଟନ୍ତି ଛୁରୀରେ

ଗୀତ ଗାଇ ଏକ ସ୍ୱରେ ।

ଜଣାନ୍ତି ସକଳେ ହେ ପ୍ରଭୁ ଈଶ୍ୱର

ଢାଳିଦିଅ ଆଶୀର୍ବାଦ

କାମନା କରୁଛୁ ଶୁଭ ଜନ୍ମଦିନ

ଶୁଭ ନାମ ଉଚ୍ଚାରିଣ ।

ବିତିଯାଉ ବର୍ଷ ମଙ୍ଗଳ ଆନନ୍ଦେ

ମନେ ରହୁ ହସ ଖୁସି

ପ୍ରସନ୍ନ ରହନ୍ତୁ ପ୍ରିୟ ପରିଜନ

ପରିବାର ସାଙ୍ଗ ସାଥି ।

ମିଠା ମିଠା କଥା ସହିତେ ବାନ୍ଧବେ

ମିଷ୍ଟାନ୍ନ ହୁଏ ବଣ୍ଟନ

ଧନୀକ ଶ୍ରେଣୀର ପିଲାଏ କରନ୍ତି

ଭୋଜିଭାତ ଆୟୋଜନ ।

ମିଳିମିଶି ସର୍ବେ ବିତାନ୍ତି ଦିନଟି

କରନ୍ତି ମନୋରଞ୍ଜନ

ବାଦ୍ୟ ନୃତ୍ୟ ତାଳେ ମଧୁର ସଙ୍ଗୀତ

ହୁଅଇ ପରିବେଷଣ ।

କେହି କେହି ପିଲା ପ୍ରତ୍ୟୁଷରୁ ଉଠି

ମାତା ପିତାଙ୍କ ଗହଣେ

ଗୃହ ବା ମନ୍ଦିରେ ପ୍ରଦୀପ ଜଳାଇ

ଆରାଧନ୍ତି ଭଗବାନେ ।

ସନ୍ତାନ ସନ୍ତତି ନୂତନ ବସ୍ତ୍ରକୁ

କରିଥାନ୍ତି ପରିଧାନ

ଅର୍ଘ୍ୟ ଥାଳ ଧରି କରିଥାନ୍ତି ମାତା

ବନ୍ଦାପନା ସୁକଲ୍ୟାଣ ।

ଗୁରୁ ଗୁରୁଜନେ ମଥା ନତ କରି

କଲେ ଭୂମିଷ୍ଠ ପ୍ରଣାମ

ମନାସନ୍ତି ସର୍ବେ ଦୀର୍ଘ ପରମାୟୂ

ଜୀବନେ ଖୁସି ଆନନ୍ଦ ।

ଆମ ସୁସଂସ୍କାର ପ୍ରଥା ଓ ଚଳନୀ

ହେଉ ଦିବ୍ୟ ସମୁଜ୍ଜ୍ୱଳ

ସମନ୍ୱୟେ ବଢୁ ଆଗ୍ରହ ଉତ୍ସାହ

ଜୀବନ ହେଉ ସ୍ୱଚ୍ଛନ୍ଦ ।

   -------