ଶ୍ରମ
ଶ୍ରମ
ଜୀବନର ପଥ ନୁହେଁତ ସୁଗମ
କେବେ ଛାଇ କେବେ ଖରା,
ପେଟପାଇଁ ଚାଲେ ସଂଘର୍ଷ ଯେଉଁଠି
ଶ୍ରମ ଦାନ କରି ପରା ।
ପ୍ରତିଟି ମନୁଷ୍ୟ ସାଜନ୍ତି ଶ୍ରମିକ
ନିଜ ନିଜ କର୍ମସ୍ଥଳେ,
ଅନ୍ନ ଚିନ୍ତା ଏଠି ସବୁରି ମନରେ
ଯୋଗାଡ଼ନ୍ତି କଳେବଳେ ।
କିଏ ଛାଡ଼ିଯାଏ ନିଜ ମାତୃଭୂମି
ତୁଟାଇ ସଂସାର ମୋହ,
ପରିବାର ପ୍ରତିପୋଷଣ ନିମନ୍ତେ
ଚାପିରଖି ଛାତି କୋହ ।
କର୍ମ ନୁହେଁ ଏଠି ଛୋଟ ଅବା ବଡ଼
ସବୁପାଇଁ ଶ୍ରମଦାନ,
ଜୀବନ ଯୁଦ୍ଧରେ ହାରେ ଜିତେ କିଏ
ଦିଏ କିଏ ବଳିଦାନ ।
କର୍ମ ଯେଉଁଠାରେ ଶ୍ରମ ସେହିଠାରେ
ଲହୁ ଲୁହ ଏକାକାର,
ମଣିଷ ଜୀବନ ସାର୍ଥକ ଲଭିବ
କର୍ମେ ଲଭିଲେ ଈଶ୍ୱର ।
ଶ୍ରମ ଦିବସରେ ପ୍ରତି ଘରେ ଘରେ
ଆନନ୍ଦ ଲହରୀ ଖେଳୁ,
ପ୍ରତି ଶ୍ରମିକର ଦୁଃଖ ଦୂର ହେଉ
ଶୁଭ ଦୀପାବଳି ଜଳୁ ।