ଶ୍ରୀରାମ ଜନ୍ମୋତ୍ସବ
ଶ୍ରୀରାମ ଜନ୍ମୋତ୍ସବ
ବାଜୁଅଛି ଶୁଭ ମଙ୍ଗଳ ମହୁରୀ
ଶଙ୍ଖ ଶିଙ୍ଗା ଭେରୀ ତୂରୀ l
ରଘୁକୂଳେ ଜାତ ଦଶରଥ ସୂତ
ବିଷ୍ଣୁ ଅଂଶେ ପୁତ୍ର ଚାରି ll
ରୁଣ୍ଡ ହୋଇଛନ୍ତି ସର୍ଵ ଦେବାଦେବୀ
ସର୍ଵ ପୁଣ୍ୟ ତୀର୍ଥାବଳୀ l
ସର୍ଵ ମୁନି ୠଷି ନାରଦ, ବାଲ୍ମୀକି
ବଶିଷ୍ଠ, କନ୍ୱ, ଜାବାଳୀ ll
ରାଜା ଦଶରଥ ଯଜ୍ଞ କରିଥିଲେ
ଆଣି ଋଷ୍ୟଶୃଙ୍ଗ ମୁନି l
ଯଜ୍ଞଚରୁ ଭକ୍ଷି ଗର୍ଭଧାରୀ ହେଲେ
ରାଜାଙ୍କର ତିନି ରାଣୀ ll
କୌଶଲ୍ୟା କୈକେୟୀ ସୁମିତ୍ରା ମହତି
କେତେ ତପ ଥିଲେ କରି l
ଶ୍ରୀରାମ, ଭରତ, ଶତ୍ରୁଘ୍ନ, ଲକ୍ଷ୍ମଣ
ପୁତ୍ର ଜନମିଲେ ଚାରି ll
ଚାରି ପୁତ୍ର ଲଭି ଆନନ୍ଦେ ଅଧୀର
ଅପୁତ୍ରିକ ଦଶରଥ l
ଅବଧ ପୁରୀରେ ଗୋଳ ଅପ୍ରମିତ
ମଙ୍ଗଳେ ଶୁଭୁଛି ଗୀତ ll
ଅବତାର ନେଲେ ଧରାଧାମେ ପ୍ରଭୁ
ଆନନ୍ଦ ଧରିତ୍ରୀ ମାତା l
ମଳୟ ମରନ୍ଦ ବହେ ମନ୍ଦ ମନ୍ଦ
ଧନ ଧାନ୍ୟ ଅକଳନ୍ତା ll
ଦୋଳିରେ ଦୋଳାନ୍ତି ପୁତ୍ରଚାରି ଘେନି
ଦଶରଥଙ୍କର ରାଣୀ l
ଆଶିଷ ପ୍ରଦାନି ଯେଝା ପୁରେ ଗଲେ
ସର୍ଵ ଦେବାଦେବୀ ମୁନି ll
ଚାଲ ଚାଲ ଭାଇ ଅଯୋଧ୍ୟାକୁ ଯିବା
ଖାଇବା ମାଲପା ଖଜା l
ଧନ ଧାନ୍ୟ ଧେନୁ ଦାନ ଦେଉଛନ୍ତି
ଦଶରଥ ମହାରାଜା ll
ପୁଣ୍ୟ ଚଇତ୍ରର ଶୁକ୍ଳ ପକ୍ଷ ଆଜି
ତିଥି ଶ୍ରୀରାମ ନବମୀ l
ନମାମି ଶ୍ରୀରାମ, ନୟନାଭିରାମ
ଶ୍ରୀପୁରୁଷୋତ୍ତମ ନମାମି ll