ଲକ୍ଷ୍ମୀ ସୁଭଦ୍ରାଙ୍କ କଳି
ଲକ୍ଷ୍ମୀ ସୁଭଦ୍ରାଙ୍କ କଳି
ବଡ଼ ଦେଉଳରେ ଲାଗିଗଲା ଦିନେ
ଲକ୍ଷ୍ମୀ ସୁଭଦ୍ରାଙ୍କ କଳି l
କଥା କଟା କଟି ମୁହଁ ଫଟା ଫଟି
ନାନା ଦ୍ୱନ୍ଦ୍ଵ ଗାଳାଗାଳି ll
ଲକ୍ଷ୍ମୀ କହୁଛନ୍ତି ଆହେ ବନମାଳୀ
ଭଉଣୀ ପାଇଛ ଖଣ୍ଡେ l
ବାହା ଦୋହଲାଇ ଛାତିକୁ ଫୁଲାଇ
ବୁଲୁଥାଇ ବଡ଼ଦାଣ୍ଡେ ll
ଲାଜ ବୋଲି ଯେଉଁ ଦୁଇଟି ଅକ୍ଷର
ଜାତକେ ତାହାର ନାହିଁ l
ସର କ୍ଷୀର ଖାଇ ହଳଦୀ ମୁହିଁଟା
ଘିରି ଘିରି ବୁଲୁଥାଇ ll
ତୁଣ୍ଡରେ ତ ତାର ବାଟୁଳି ବାଜେନା
ଡବ ଡବ ଯାଏ ବକି l
ନାକକୁ ଫୁଲେଇ ନୋଲକ ହଲେଇ
ବୁଲଇ ଯେସନ ବକୀ ll
ସୁଭଦ୍ରା କହନ୍ତି ଶୁଣ ଲୋ ଭାଉଜ
ବାସ ଥିଲା ତୁମ୍ଭ ଜଳେ l
କାଳିଆ ଭାଇକୁ ପାଇଛ ମୋହର
କେଡ଼େ ତୁମ୍ଭ ଭାଗ୍ୟବଳେ ll
କାଳିଆ ବଳିଆ ଦୁଇଭାଇ ମୋର
ଜଗତ ଜୀବନ ହରି l
କିବା ଗୁଣେ ତାଙ୍କ ସରିହେବ ତୁମ୍ଭେ
ଜଗତେ ପଡ଼ିଛି ହୁରି ll
ଗ୍ରୀବା ଦୋହଲେଇ ଝଗଡ଼ା କରୁଛ
ନାକରେ ନାଇଛ ଗୁଣା l
ବାଇଠାକୁରାଣୀ ମିଛଟାରେ ମୋତେ
ଦେଉଅଛ ଉଲୁଗୁଣା ll
ଏ କାଳେ ମିଳିଲେ ବଳଦେବ ଆସି
ଶ୍ରୀକ୍ଷେତ୍ର ବଡ଼ ଠାକୁର l
ସୁଭଦ୍ରାଙ୍କୁ ରାଇ କହିଲେ ବୁଝେଇ
ଶୁଣଲୋ ଭଉଣୀ ମୋର ll
ବୋହୁ ସାଆନ୍ତାଣୀ ଶ୍ରୀକ୍ଷେତ୍ରର ରାଣୀ
ଜଗତର ଠାକୁରାଣୀ l
ମୁରବୀ ପଣରେ ଦି କଥା କହିଲେ
ଅବଶ୍ୟ ତାହାକୁ ଶୁଣି ll
ଲକ୍ଷ୍ମୀଙ୍କୁ ବୁଝେଇ କହନ୍ତି ଠାକୁରେ
ଶୁଣ ଆହେ ସିନ୍ଧୁଜେମା l
ସୁଭଦ୍ରିକା ଆମ୍ଭ ଗେହ୍ଲା ଭଉଣୀଟା
ଗାଳି ଦେବନାହିଁ ଜମା ll
ବଡ଼ ଠାକୁରଙ୍କ ବାଣୀ ଶୁଣି ମାଆ
ଦୁଇ କ୍ଷେତ୍ର ଠାକୁରାଣୀ l
କାନ୍ଦି କଇଁ କଇଁ ପଡ଼ିଲେ ଘୁମେଇ
ଭଦ୍ରା ସାଗର ଦୁଲଣୀ l।
ଧନ୍ୟ ଧନ୍ୟ ପ୍ରଭୁ ଜଗତ ଠାକୁର
ଧନ୍ୟ ତୁମ୍ଭ ପରିବାର l
ବଳିଆ କାଳିଆ ଭଦ୍ରା ସାଗରିକା
ଶ୍ରୀକ୍ଷେତ୍ରେ କରିଛ ଘର ll
ହଟିଆ ନଟିଆ ନାଟୁଆ ଠାକୁର
ବାନା ଉଡ଼େ ଫର ଫର l
ଚତୁର ନାଗରେ ଚାତର ଠାକୁରେ
କୋଟି କୋଟି ନମସ୍କାର l