ଶ୍ରାବଣ ଆଗମେ ଧରା ହସଇ
ଶ୍ରାବଣ ଆଗମେ ଧରା ହସଇ
ପୁନେଇଁ ପରବ ସମ୍ଭାର ନେଇ
ଶ୍ରାବଣ ଆଗମେ ଧରା ହସଇ
ବରଷଇ ବାରିଧାରା
ବରଷା ଆସିଛି ସାଥିରେ ଆଣିଛି
କୃଷିର ପରବ ପରା ।
ଆନନ୍ଦେ ହସୁଛି ଧରଣୀରାଣୀ
ଦିନ ରାତି ଏବେ ବରଷେ ପାଣି
ତରୁଲତା ନବରୂପ
ଧରି ବିରାଜନ୍ତି କିଶଳୟ ପନ୍ତି
ଦିଶନ୍ତି କି ଅପରୂପ ।
ସବୁଜ ଗାଲିଚା ଧରଣୀ ଶାଢୀ
ଦିଶେ କି ସୁନ୍ଦର ରହିଛି ଜଡି
କୁସୁମକାନ୍ତି ବିକଶେ
ବାସ ଚହଟଇ ମହକରେ ତାର
ଚଉଦିଗ ଏବେ ବାସେ ।
ଆସେ ଚିିତାଲାଗି ଅମାବାସିଆ
ଶ୍ରୀଜଗନ୍ନାଥଙ୍କ ପରବ ଏହା
ପ୍ରଭୁଙ୍କର ମସ୍ତକରେ
ସୁନାଚିତା ଲାଗେ ଉଲାଗି ହେଲା ଯା
ସ୍ନାନଯାତ୍ରା ସମୟରେ ।
ଚିତୋଉ ପିଠା ହୁଏ ଘରେ ଘରେ
ଭୋଗ ଲାଗେ ଠାକୁରଙ୍କ ପାଖରେ
ଧାନବିଲେ ନେଇ ପିଠା
ଧାନଗଛ ମୂଳେ ପୋତନ୍ତି ତାହାକୁ
ରକ୍ଷା ହେବ ଗେଣ୍ଡାକଟା ।
ଶ୍ରୀଜଗନ୍ନାଥଙ୍କ ଝୁଲଣ ଆସେ
ମଠ ମନ୍ଦିର ସତେ ଅବା ହସେ
ଜରି ଜମ୍ବୁରାର କୁଞ୍ଜେ
ଶ୍ରୀରାଧା ଶ୍ରୀକୃଷ୍ଣ ବିରଚନ୍ତି ରାସ
ଭକତଙ୍କ ମନ ରଞ୍ଜେ ।
ବଳଭଦ୍ର ଜନ୍ମ ଗହ୍ମାପୁନେଇଁ
ରକ୍ଷାବନ୍ଧନର ପରବ ନେଇ
ଆସିଛି ଶ୍ରାବଣ ମାସ
ଭାଇ ଭଉଣୀଙ୍କ ସ୍ନେହର ବନ୍ଧନ
ରାକ୍ଷୀ ପରବ ବିଶେଷ ।
ଶ୍ରାବଣ ପୁଲକ ଆଣେ ମନରେ
ପୁନେଇଁ ପରବ ଆଣେ ସମ୍ଭାରେ
ଶ୍ରାବଣ ଆଗମେ ଧରା
ହସି ଉଠେ ଆମ ସଂସ୍କୃତି ମହାନ
ଉତ୍କଳୀୟ ପରମ୍ପରା ।