ଜୟ ଜବାନ ଜୟ କିଷାନ
ଜୟ ଜବାନ ଜୟ କିଷାନ
ଜବାନ ହାତରେ ଦେଶର ସୁରକ୍ଷା
କରେ ଦେଶ ଜୟ ଗାନ,
ଶ୍ରମିକ ହାତରେ ଗଢ଼ା ହୁଏ ଦେଶ
କରେ ସିଏ ଶ୍ରମ ଦାନ |
ଭାରତରେ ଯେବେ ଲାଲ ବାହାଦୁର
ପ୍ରଧାନମନ୍ତ୍ରୀ ଯେ ଥିଲେ,
ଜୟ ଜବାନ ଓ ଜୟ କିଷାନ ର
ସ୍ଲୋଗାନେ ଆହ୍ୱାନ କଲେ |
ଭାରତ ବର୍ଷର ସୀମାରେ ସତର୍କ
ଦେଶର ବୀର ଜବାନ,
ପଡୋଶୀ ଦେଶର ଛାତିରେ କମ୍ପନ
ପଛେ ଫେରେ ଶତ୍ରୁ ସୈନ୍ୟ |
ଅତି ଆଧୁନିକ ଅସ୍ତ୍ରରେ ସଜ୍ଜିତ
ଦେଶର ସୈନ୍ୟ ବାହିନୀ,
ଆକାଶେ ଗର୍ଜେ ସେ ସାଗରେ ପ୍ରକମ୍ପି
ଗାଏ ଜୟ ଆବାହନୀ |
ଦେଶର ଶ୍ରମିକ ଶ୍ରମଦାନେ ତାର
ଭରେ ଦେଶେ ଦଉଲତ,
ଗଢିଛି ସହର ଗଢିଛି ମନ୍ଦିର
ଅଟ୍ଟାଳିକା ଅଗଣିତ |
କେତେ ରାଜରାସ୍ତା ଗଢିଛି ଯତନେ
ଢାଳିଛି ତା ଦେହୁ ରକ୍ତ,
ଡରିନାହିଁ କେବେ କରିବାକୁ ଶ୍ରମ
ଜୀବନେ ସେ କରି ବ୍ରତ |
କୃଷକର ଶ୍ରମ ଶ୍ୟାମଳ କ୍ଷେତରେ
କୋଟି ମୁଖେ ଖାଦ୍ୟ ଦିଏ,
ସୁନାର ଫସଲେ ଦେଶର ବୁକୁକୁ
ସସ୍ନେହେ ସଜାଇ ଥାଏ |
ଶ୍ରମିକ, ଜବାନ, କୃଷକ ଦେଶରେ
ସବୁଠାରୁ ଗରୀଆନ,
ସଭିଙ୍କ ଉଦେଶ୍ୟ ଦେଶର ଉନ୍ନତି
ଶ୍ରେଷ୍ଠ ତାଙ୍କ ଅବଦାନ |
ଦେଶର ଗୌରବ ତାଙ୍କ ପାଇଁ ସିନା
ବିଶ୍ୱେ ଆଜି ପରିଚିତ,
ଏକତାର ମନ୍ତ୍ରେ ସେମାନଙ୍କ ତ୍ୟାଗ
କରେ ସଦା ଜନ ହିତ |