ଶ୍ରୀଗୁଣ୍ଡିଚା
ଶ୍ରୀଗୁଣ୍ଡିଚା
ଟିକେ ହଲିହଲି ଟିକେ ପୁଣି ଝୁଲି
ଠେଲାପେଲା ଖାଇ ଖାଇ,
କାଳିଆ ଆସୁଛି ଗହଳି ଲଗାଇ
ସଂଗେ ଘେନି ଭଗ୍ନୀ,ଭାଇ |
ବଡଦାଣ୍ଡ ପରେ ଶୋଭା ବିମଣ୍ଡିତ
ତିନିରଥ ସଜ୍ଜ ହୋଇ,
ନବଦିନ ପାଇଁ ଗହଳି ଲଗାଇ
ଆସୁଛନ୍ତି ଭାବଗ୍ରାହୀ |
ସୁନ୍ଦର ବେଶରେ ସାଜସଜ୍ଜା ହୋଇ
ଦିଶୁଛନ୍ତି ମନୋହର,
ତୁଳସୀ ଦୟଣା ଝଡ଼ି ପଡ଼ୁଅଛି
ଦେଖି ପ୍ରାଣ ମୋ ଅଧୀର |
ଏଡ଼େ ନଟଖଟ ନନ୍ଦ କୁମର ସେ
ଧୂଳିରେ ମାଟିରେ ଗଡ଼େ,
ଲୀଳା କରିକରି କେବେ ଭକ୍ତ କାନ୍ଧେ
ଟିକିଏ ଆଉଜି ପଡ଼େ |
ଅଝଟିଆ ପଣ ଯାଇନି ଜଗାର
ଭୁଲିନି ଦ୍ୱାପର ଲୀଳା,
ବଡଦାଣ୍ଡକୁ ସେ ବୃନ୍ଦାବନ କରି
ରଚୁଅଛି ଲୀଳାଖେଳା |
ଟାହିଆ ହଲେଇ ଧିମେଇଁ ଧିମେଇଁ
ଆସୁଅଛି ଲୀଳାଧାରୀ,
ମାଉସୀ ଘରକୁ ଯିବାପାଇଁ ସଜ
ବେଳ ଯାଉଅଛି ଗଡ଼ି |
ପୋଡପିଠା କରି ଯତନରେ ଧରି
ଅପେକ୍ଷାରେ ଛନ୍ତି ରହି,
କେବେ ଆସିବେ ସେ କାଳିଆ ସାଆନ୍ତ
ସମୟଟା ସରେନାହିଁ |
ଗୁଣ୍ଡିଚା ରାଣୀଙ୍କ ମନ ଯେ ପ୍ରସନ୍ନ
ପାଦ ଲାଗୁନାହିଁ ତଳେ,
ଘରକୁ ଆସିବେ ଭାବ ବିନୋଦିଆ
କାହିଁ କେତେଦିନ ପରେ |
ଘଣ୍ଟ ଘଣ୍ଟା ନାଦେ ଧରଣୀ କମ୍ପୁଛି
ରଥ ଯାଏ ଗଡ଼ି ଗଡ଼ି,
ଆଲଟ,ଚାମର ସେବା ଚାଲୁଅଛି
ଡାହୁକ ଛାଡ଼ନ୍ତି ରଡ଼ି |
ଦୁଇ ବର୍ଷ ହେଲା ବିନା ଭକତରେ
ଯାତ୍ରା ତୁମ ସମ୍ପାଦଇ,
କେବେ ଏ ସଂସାର ସଚଳ କରିବ
ପୂର୍ବପରି ଭାବଗ୍ରାହୀ |
ତୁମେ ଆମ ପ୍ରାଣ ତୁମେତ ଜୀବନ
ତୁମବିନା ନାହିଁ ଶାନ୍ତି,
ଦୂର କରିଦିଅ ସଂସାରୁ ବିପତ୍ତି
ଆହେ ଅଗତିର ଗତି |
ମଧୁସ୍ମିତା ପୃଷ୍ଟି,ଭୁବନେଶ୍ୱର,ଖୋର୍ଦ୍ଧା