Library
ଶ୍ରୀ ଶୈଳପୁତ୍ରୀ
ଶ୍ରୀ ଶୈଳପୁତ୍ରୀ
ଶକ୍ତି ସ୍ୱରୂପିଣୀ ଅଭୟ ଦାୟିନୀ
ମୁକ୍ତି ପ୍ରଦାୟିନୀ ମାତା
ମମତାମୟୀ ମା କଲ୍ୟାଣକାରେଣୀ
ବନ୍ଦେ ଗିରିରାଜ ସୂତା ।
ଆଦ୍ୟାଶକ୍ତି ତୁମ୍ଭେ ନବଦୁର୍ଗା ମଧ୍ୟେ
ଶୈଳପୁତ୍ରୀ ମାଆ ପାର୍ବତୀ
ହୈମବନ୍ତ ଗିରି ପିୟର ତୁମ୍ଭର
ମାତା ନାମ ମେନାବତୀ ।
ବୃଷଭ ଆରୁଢ଼ା ତ୍ରିଶୂଳ ଧାରିଣୀ
ପଦ୍ମହସ୍ତ ସୁଶୋଭିତା
ଅର୍ଦ୍ଧଚନ୍ଦ୍ର ତୁମ୍ଭ ମସ୍ତକେ ବିରାଜେ
ତେଜ କୋଟି ସୂର୍ଯ୍ୟସ୍ନାତା ।
ମୂଳାଧାରେ ମନ କରିଦେଇ ସ୍ଥିର
ସାଧକ କରଇ ଧ୍ୟାନ
ଚନ୍ଦ୍ରଦଶା ଥିଲେ ଦୂର ହୋଇଯାଏ
ତୁମ୍ଭ ପଦେ ଦେଲେ ମନ ।
ଅଜ୍ଞାନ ବାଳୁତ କରୁଛି ପ୍ରଣାମ
ବିଦ୍ୟା ବୁଦ୍ଧି ମୋର ନାହିଁ
ଆହେ ପରାଶକ୍ତି ତୁମ୍ଭର ମହିମା
ବର୍ଣ୍ଣିବାକୁ ଶକ୍ତି କାହିଁ ।
ଶାରଦ ପାର୍ବଣ ନବରାତ୍ର ମଧ୍ୟେ
ଆଦ୍ୟେ ପାଅ ତୁମ୍ଭେ ପୂଜା
ସନ୍ତାନ ବତ୍ସଳା ଦୁର୍ଗତି ନାଶିନୀ
ଉଡ଼ାଇ ବିଜୟ ଧ୍ଵଜା ।
କ୍ଷମା କର ମାତ ମୁଁ ଅବୋଧ ସୂତ
ଭକ୍ତିହୀନ ଜ୍ଞାନହୀନ
ମାତା ବୋଲି ତୁମ୍ଭ ଚରଣେ ସମର୍ପି
ଦେଲି ମୋର ତନୁ ପ୍ରାଣ ।
