ଶ୍ରୀ ଜଗନ୍ନାଥ ଜଣାଣ
ଶ୍ରୀ ଜଗନ୍ନାଥ ଜଣାଣ
ଜଗବନ୍ଧୁ ବନ୍ଧୁ ଘେନ ଅରଜ
ଜଗତ ଜୀବନ ହେ ଭଦ୍ରାଗ୍ରଜ
ଜଣାଣ କରିବ ନାହିଁ ଖାରଜ
ଜଞ୍ଜାଳ ଯନ୍ତ୍ରିତ ମୋର ମଗଜ
ଜଳପେ ପଦ ନୀରଜ
ଜଗତର ନାଥ ତୁମେ ଜଗନ୍ନାଥ ନୀଳଗିରି ମତ୍ତଗଜ ।
ଗରୁଡ଼ ଆସନ ହେ ମହା ଭାଗ
ଗରିଷ୍ଠ ପାତକୀ ତାରିଛ ଆଗ
ଗଭୀର ଜଳୁ ଉଦ୍ଧରି ମାତଂଗ
ଗହନ ବନରେ ମୄଗୀ ପ୍ରସଂଗ
ଗଞ୍ଜି ଗର୍ବୀ ଗର୍ବ ନଗ
ଗବୀଶ ଆସନ ଶକ୍ର କୁଶାସନ ଚରାଚର ଅପଵର୍ଗ ।
ନାଗରୀଙ୍କ ପୂର୍ଣ୍ଣ କରି କାମନା
ନାଗରେଶ କଲ ଧରା ମଣ୍ଡନା
ନାମ ସ୍ମରୁ ହଟେ ଯମ ଯାତନା
ନାହିଁ ଭୟ ନାହିଁ ଅନୁଶୋଚନା
ନାଶ କଳୁଷ ବେଦନା
ନାକ ନାଗ ନର ପୂଜିତ ପୟର ବନ୍ଦ୍ୟ ସୁମନା ସୁମନା ।
ଥୟ ଚକ୍ରନେତ୍ର ଜୀବନ ପଥ
ଥରଥର କମ୍ପେ ଶରୀର ରଥ
ଥକ୍କା ମନ ମୋର ସଦା ବିପଥ
ଥରଟିଏ ଡାକ ଶୁଣ ହେ ନାଥ
ଥଣ୍ଟ ଚିରା ଜଗନ୍ନାଥ
ଥଟ୍ଟା କରନାହିଁ ପ୍ରଭୁ ଭାବଗ୍ରାହୀ ଅଳି କରେ ଜଗନ୍ନାଥ ।