ଶ୍ରେଷ୍ଠ ବନ୍ଧୁ

ସମ୍ପର୍କ ସେତୁରେ ସୃଷ୍ଟିରେ ସ୍ରଷ୍ଟା ଙ୍କ

         ବନ୍ଧୁତା ଅନନ୍ୟ ଦାନ,

ଈଶ୍ୱରୀୟ କୃପା ବଳେ ବନ୍ଧୁ ମିଳେ

        ନିର୍ମଳ ହୋଇଲେ ମନ ।

ସଂସାର ହାଟରେ ମନଖୋଜେ ବନ୍ଧୁ

          ଚାହେଁ ନିବିଡ଼ ବନ୍ଧୁତା,

ମୁଠାଏ ସେନେହ ଆଞ୍ଜୁଳାଏ ଶ୍ରଦ୍ଧା

           ନିବିଡ଼ ଆନ୍ତରିକତା ।

ଜୀବନ ଯମୁନା ଉଜାଣି ସ୍ରୋତରେ

        ସ୍ନେହ, ମମତା, ମିତ୍ରତା,

ଭାବରୁ ଦୂରକୁ ଠେଲି ଦେବ ନାହିଁ

       ଥିଲେ ପ୍ରକୃତ ବନ୍ଧୁତା ।

ଅନ୍ତରାୟ କେବେ ସମୟ ହୁଏନା

       ମନରେ ନିଷ୍ଠା ରହିଲେ

ସମ୍ପର୍କର ଡୋର ନିବିଡ଼ ହୋଇବ

       ବାସ୍ତବ ବନ୍ଧୁତା ଥିଲେ ।

ଭୁଲ ବୁଝାମଣା ବନ୍ଧୁତା ଭାଙ୍ଗେନା

         ଯଦି ଥିବ ବନ୍ଧୁ ଭାବ,

ବନ୍ଧୁତା ଠୁଁ ବଳି ପବିତ୍ର ସମ୍ପର୍କ

         ଜଗତେ କାହୁଁ ପାଇବ ।

ବନ୍ଧୁଟିଏ ମିଳେ କୋଟିପୁଣ୍ୟ ବଳେ

          ଭାବ ପରସ୍ପର ପ୍ରତି,

ଜହ୍ନ ଓ ଜୋଛନା ଚନ୍ଦନ ଓ ବାସ୍ନା

         ଶ୍ରଦ୍ଧା ରେ ଯେସନ ପ୍ରୀତି ।

ଏ ମାୟା ସଂସାରେ ବନ୍ଧୁର ପଥରେ

          ଭାବ ସାଗରରେ ବୁଡି,

ପ୍ରଭୁ ଙ୍କୁ ବାନ୍ଧିବ ଭକ୍ତି ସମର୍ପଣେ

         ମୋହ ମାୟା ସବୁ ଛାଡି ।

ବନ୍ଧୁ ଭଳି ବନ୍ଧୁ ପ୍ରଭୁ ଜଗବନ୍ଧୁ

       ମନ ଆକାଶର ଇନ୍ଦୁ,

ଶ୍ରଦ୍ଧା ପଣେ ଭାବେ ବାସ୍ତବରେ ତୁମେ

       ଜୀବନ ର ଶ୍ରେଷ୍ଠ ବନ୍ଧୁ ।