ଶ୍ରାବଣୀ ଆସିଛି ଶ୍ରାବଣ ନେଇ

ମେଘ ମହ୍ଲାର ଦରଶନେ କେକୀ

ନାଚୁଥିଲା ଯେବେ ପୁଚ୍ଛ ହଲାଇ ।

ଘନ ଘନ ଘନ ବରଷା ହୋଇଲା

ଶ୍ରାବଣୀ ଆସିଲା ଶ୍ରାବଣ ନେଇ ।

ଆଖିର ଚମକ ଚଞ୍ଚଳା ତାହାର

ପରିଧାନ କଳାମେଘୀ ବସନ ।

ଆଷାଢୀ ନାୟିକା ନେଇଛି ବିଦାୟ

ଶ୍ରାବଣୀ ଆଣିଛି ଧାରା ଶ୍ରାବଣ ।

ଆସିବା ଆଗରୁ ସବୁଜ ଶାଢୀରେ

ସଜାଇ ହୋଇଛି ଧରଣୀ ରାଣୀ ।

କୁସୁମିତ ହେଲା ବନ ଉପବନ

ସହଜେ ସୁବାସ ବିତରେ ଆଣି ।

ଶ୍ରାବଣୀ ଆସିଛି ଶ୍ରାବଣକୁ ନେଇ

ରଟିଲା ଧରାରେ ଚଉଦିଗରେ।

ସ୍ବାଗତ ଜଣାଏ ସାରୁଗଛ ମୂଳେ

ବେଙ୍ଗୁଲୀଟି ବସି ହୁଳହୁଳିରେ ।

ଟାଉ ଟାଉ ହୋଇ ସାଧବବୋହୁଟି

ପାଛୋଟି ଆସୁଛି ଶ୍ରାବଣୀଟିକୁ।

ଅଶନି ଗର୍ଜନ ପଡିଲା କାନରେ

ବରଷା ଆସିଲା ତାହା ପଛକୁ ।

ଲୁଚିଗଲା ଯାଇ ଘାସ ତଳେ ସିଏ

ଛାଡିଲା ବରଷା ଆସିଲା ଖରା ।

ଦେବରାଜଧନୁ ଶୋହିଲା ଆକାଶେ

ଅପରୂପ ରୂପ କି ମନୋହରା ।

ଶ୍ରାବଣୀ ଆସିଛି ଶ୍ରାବଣକୁ ନେଇ

ଆସେ ଚିତାଲାଗି ଅମାବାସିଆ ।

ରକ୍ଷାବନ୍ଧନର ପରବ ଆସୁଛି

ବଳଭଦ୍ର ପୂଜା ଓ ଗହ୍ମାଡିଆଁ ।

ଧାରା ଶ୍ରାବଣରେ ମୂଷଳ ଧାରାରେ

ବରଷେ ବରଷା କଦବା ପୁଣି।

ରିମି ଝିମି ହୋଇ ବରଷା ଜଣାଏ

ଶ୍ରାବଣ ଆଣି ଆସିଛି ଶ୍ରାବଣୀ ।

ଶସ୍ଯ ଶ୍ୟାମଳ ଏ ଧରଣୀ ହୁଅଇ

କାଗଜର ଡଙ୍ଗା ଶିଶୁ ଭସାଏ ।

ଖେଳଇ ଆନନ୍ଦେ ତିନ୍ତି ବରଷାରେ

ବରଷାକୁ ତା ଖାତର ନଥାଏ ।

ସବୁ ବରଷ ତ ଶ୍ରାବଣୀ ଆସୁଛି

ଶ୍ରାବଣକୁ ନେଇ ସାଥିରେ ତାର ।

ଏହିପରି ସଦା କାଳ ପ୍ରଭାବରେ

ଆସୁଥିବ ସଦା ସେ ବାରମ୍ବାର ।