ଶ୍ରାବଣ

ଟୁପୁରୁ ଟୁପୁରୁ ମେଘ ବରଷିଲା

କେଶୁର ମାଇଲା ଗଜା,

ଶ୍ରାବଣ କହିଛି ମେଘ ଆଣିବଲୋ

ସଜନୀ ସଜ ହୋଇଯା ।

କଳା କଳା ମେଘ ଗଗନରେ ନାଚେ

ବିଜୁଳି ଦିଶଇ ତୋରା,

ଘଡ ଘଡ଼ ଘଡ଼ ଘଡଘଡି ଶୁଭେ

ମଳିନ ପଡିଲା ଖରା ।

ଧୋବ ଫର ଫର ବଗ ବଗୁଲି ଯେ

ଆକାଶେ ଯାଆନ୍ତି ଉଡି,

ଝର ଝର ଝରେ ଶିରାବଣ ଧାରା

କୁଳ ଲଂଘେ ନଇ ବଢ଼ି ।

ଚାଷ ତରତର ବଣିଜ ମଠ ଲୋ

ଏ ଯେ ବଡ ପୁରୁଷ ର ବାଣୀ,

ସାରୁ ଗଛ ମୂଳେ ବେଙ୍ଗ ବେଙ୍ଗୁଲି

ନାଚନ୍ତି ସାଜି ରାଜା ରାଣୀ ।

ନାଲି ଟୁକୁ ଟୁକୁ ସାଧବ ବୋହୂ ଲୋ

ଘାସ ଗାଲିଚାରେ ଉଭା,

ପ୍ରେୟସୀ ର ମନ ଆଜି ଛନ ଛନ

ମୁଖ ମଣ୍ଡଳେ ତା ଆଭା..!!

କଳା ମେଘ ଦେଖି ମୟୁର ମୟୂରୀ

ନୃତ୍ୟ ରଙ୍ଗେ ଛନ୍ତି ମାତି,

କଥା ଦେଇଛନ୍ତି ପ୍ରେମିକ ଆସିବେ

ପ୍ରେମିକା ଦେହେ ବଢେ ତାତି ।

ଧାରା ଶ୍ରାବଣ ଯେ ଲହଡି ଭାଙ୍ଗୁଛି

କର୍ଣ୍ଣେ ଶୁଭେ ଶିବ ନାମ,

କୁମାରୀ ଚାହୁଁଛି ସୁନ୍ଦର ବରଲୋ

ଯାଏ ମହାଦେବଙ୍କର ଧାମ।