ଶୋଉଛୁ ସୁଖରେ ତୁମରି ପାଇଁ
ଶୋଉଛୁ ସୁଖରେ ତୁମରି ପାଇଁ
ବାୟୁ ସେନା ଦିବସରେ ଆଜି ମୁହିଁ
ଯବାନ ଭାଇ, ଭଗ୍ନୀଙ୍କୁ
ଜଣାଏ ଶୁଭେଚ୍ଛା ଅନ୍ତରରୁ ସଦା
ତୁମ ମହତ କର୍ମକୁ ।
ଜୀବନକୁ ଖାତିର ନ କରି ଆଜି
ଭାରତ ମା'କୁ ସୁରକ୍ଷା
ଦେଇ ଦେଖାଉଛ ଯେଉଁ ପରାକାଷ୍ଠା
ପ୍ରଭୁ ଯେ କରିବେ ରକ୍ଷା ।
ବ୍ୟୋମରେ ଉଡ଼ିଣ ଶତ୍ରୁଙ୍କର ଗତି
ବିଧି ନିରୀକ୍ଷଣ କରି
ନିଷ୍ଫଳ କରୁଛ ତାଙ୍କରି ଯୋଜନା
କିଏ ହେବ ତୁମ୍ଭ ସରି ।
ପଛଘୁଞ୍ଚା ନାହିଁ ତୁମରି ଜାତକେ
ପ୍ରାଣ ପ୍ରତି ନାହିଁ ଡର
ଭାରତ ମାଆ ର ବରପୁତ୍ର ପୁତ୍ରୀ
କର୍ମେ ଅଟ ଆଗୁସାର ।
ଶାନ୍ତି ପ୍ରିୟ ଏହି ଭାରତ ବର୍ଷର
ସଂସ୍କୃତି,ଆଦର୍ଶ ନେଇ
ସତ୍ୟ, ଧର୍ମ ପଥେ ଆଗକୁ ଚାଲିଛ
ନୂଆ ଇତିହାସ କହି ।
କର୍ମ ମହାମନ୍ତ୍ର , କର୍ମ ମହାତନ୍ତ୍ର
କର୍ମକୁ କରି ସାରଥି
ଚଳାଉଛ ଯେଉଁ ସୁରକ୍ଷାର ରଥ
ହେବ ତା' ପାଦେ ପ୍ରଣତି ।
ଏକଶ' ଚାଳିଶି କୋଟି ଭାରତୀୟ
ତୁମ୍ଭ ଜୟ ଧ୍ବନୀ ଦେଉ
ତୁମରି ପାଇଁ ତ ଦିବା ନିଶି ଆମ୍ଭେ
ନିରାପଦେ ଶୋଇ ଥାଉ ।
ବିଜୟର ଟୀକା ପିନ୍ଧାଇ ଦେଉଛୁ
ଆଜି ପବିତ୍ର ଦିନରେ
ଦୃଢ଼ ମନୋବଳ , ଅପୂର୍ବ ସାହସ
ଦେଖାଅ ଅରାତି ଠାରେ ।
" ଜାତସ୍ୟ ହି ଧ୍ରୁବ ମୃତ୍ୟୁ" ସତ୍ୟ ଏହା
ପ୍ରଯୁଜ୍ୟ ସବୁରି ପାଇଁ
ତୁମ୍ଭକର୍ମ ଆଉ ବଳିଦାନ କେବେ
ଦେଶ ଭୁଲି ଯିବ ନାହିଁ ।
ଦେଶ ମାତୃକାର ରକ୍ଷା ପାଇଁ ଯେଉଁ
ନେଇଛ ଭୀଷ୍ମ ଶପଥ
ପୂର୍ଣ୍ଣ ହେବ ନିଶ୍ଚେ ଗାଉ ଜୟ ଗୀତି
କରିଣ ଅଭିମନ୍ତ୍ରିତ ।