ଶିଶୁ
ଶିଶୁ
ସରଳ ଜୀବନ ଶିଶୁ ମନୋରମ
ହୃଦୟ ନିର୍ମଳ ତା'ର
ଶାନ୍ତମୟ ଭାବ ଆନନ୍ଦିତ ମନ
ରହେ ଧର୍ମେ ନିରନ୍ତର ||
କୋମଳ ହୃଦୟ ନଥାଏ ନିର୍ଦ୍ଦୟ
ଈଶ୍ୱର ପ୍ରେମରେ ଚିତ୍ତ
ପିତୃ ମାତୃ ଭକ୍ତି ସାଧୁସନ୍ଥ ପ୍ରତି
ସ୍ନେହେ ପ୍ରେମେ ରହେ ରତି ||
ଶିଶୁର ଭାବନା ନୁହେଁ ଆନମନା
ମାତୃଶକ୍ତିରୁ ଆସଇ
ମାତାର ଶରୀର କୁମ୍ଭାରର ଘର
ଯାହା ସେ ସୃଷ୍ଟି କରଇ ||
ମାଆର ତନୁରେ ଶୁଦ୍ଧତା ପବିତ୍ର
ଜାଗରିତ ଯେବେ ରହେ
ମହନୀୟ ଗୁଣ ତା' ପରିପୂରଣ
ଶିଶୁକୁ ପ୍ରେରଣା ଦିଏ ||
କୁମ୍ଭାର ମାଟିକୁ ଯେପରି ଗଢ଼ଇ
ଆକାର ସେପରି ହୁଏ
ମାତା ପିତା ଠାରୁ ପ୍ରତିବେଶୀ ଠାରୁ
ଯାହା ଶିଶୁ ଶିକ୍ଷି ଥାଏ ||
ମାତା ପିତା ଗୁରୁ ପ୍ରଥମେ ଶିଶୁର
ପରିବାର ଶିକ୍ଷାଳୟ
ପ୍ରକୃତ ମାର୍ଗର ଶିକ୍ଷା ପ୍ରଦାନର
ହୁଏ ସେଠି ଦେବାଳୟ ||
ଶିଶୁର ଚଳଣି ମାତାର ଗଢ଼ଣି
ନଖ ଦର୍ପଣରେ ଥାଇ
ସଭିଙ୍କ ସମ୍ମୁଖେ ଶିଶୁଙ୍କର ଶିକ୍ଷା
ଲୁଚି ରହିପାରେ ନାହିଁ ||
ଫୁଲର କଢ଼ିକୁ ବିକଶିତ କରେ
ଅନୁକୂଳ ପରିବେଶ
ଶିଶୁ ହିଁ ଦେଶର ଆଗାମୀ ପିଢ଼ିର
ଭବିଷ୍ୟତର ସୁବାସ ||
ଜୀବନ ଆଦର୍ଶ ହୁଅଇ ବିକାଶ
ଶୃଙ୍ଖଳା ଜ୍ଞାନ ହିଁ ଥିଲେ
ଉତ୍ତମ ସମ୍ପର୍କ ସଦାଚାର ପୂର୍ଣ୍ଣ
ସଫଳତା ଲାଭ ଭଲେ ||
ଶ୍ରଦ୍ଧା ଭକ୍ତି ଭାବ କରି ନିଷ୍ଠା ବାନ
ହୁଏ ସେ ଦାୟିତ୍ୱବାନ
ସେହି ଶିଶୁ ଲଭେ ସମ୍ମାନର ସ୍ଥାନ
ଦେଶରେ ଯୋଗ୍ୟ ସନ୍ତାନ ||
ଶିଶୁ ଭବିଷ୍ୟତ ଦେଶର ମହତ
ତା ପ୍ରତି ରଖ ହେ ଧ୍ୟାନ
ଶିଶୁ ନୁହେଁ ହୀନ ସେହି ମୂଲ୍ୟବାନ
ବିଶ୍ୱରସେ ମହୀୟାନ ||