ଶିଶୁ କବିତା ---ହୁଅ ଭଲ ମଣିଷଟେ

ଜାଣିରଖ ପିଲେ ମନେ ଦୟା ଭାବ

ତ୍ୟାଗ ସ୍ନେହ କ୍ଷମା ଦାନ

ମହାନ କରାଏ ବ୍ୟକ୍ତି ପାଖେ ଥିଲେ

ହେଉ ପଛେ ତୁଚ୍ଛ ଜନ

ନେବା ଠାରୁ ଦେବା ସନ୍ତୋଷ କାରଣ

ଆଚରିଲେ କ୍ଷମା ଭାବ

ପରଉପକାର ସେବା ବଳେ କାଳେ

ତୋଷ ହ୍ୱନ୍ତି ଯେ,ମାଧବ

ଭୋକିଲା ଉଦରେ ଦାନା ଦେଲେ ମିଳେ

ଅମାପ ଆତ୍ମ ତୃପତି

ଦୁଃଖି ଜନ ମୁଖେ ହସ ଫୁଟାଇଲେ 

ଲାଗଇ ଅପୂର୍ବ ଶାନ୍ତି

ଛଡାଇ ନ ନେଇ ବଢାଇ ଦିଏ ଯେ

ପ୍ରିୟ ଦ୍ରବ୍ୟ ଅପରକୁ

ତା' ଠାରୁ ବଳି କେ ବିଶାଳ ହୃଦୟ

 ଖୁସି ଯେ ଦିଏ ଆନକୁ

ଭଲ ମଣିଷଟେ ହେବା ଟି ଅଧିକ

ଗୁରୁତ୍ୱ ଅଟେ ଜୀବନେ

ଧନ ମାନ ରୂପ ଅସ୍ଥାୟୀ ସଂସାରେ

ମାଟିରେ ମିଶେ ମରଣେ

ସୁଗୁଣ ଆଚରି ଅଭ୍ୟାସ ବଳରେ

ହୁଅ ଭଲ ମଣିଷଟେ

କୁଠାର ବଚନ ନ କହିବ କେବେ

ମହାପାପ ଏ ଯେ ଅଟେ