ଶିକ୍ଷକ
ଶିକ୍ଷକ
ସଂସାରଟା ଆମ ଜ୍ଞାନର ଭଣ୍ଡାର
ଯେତେ ଶିିକ୍ଷା କଲେ ନ ସରେ,
ଏନ୍ତୁଡ଼ିଶାଳରୁ ଶ୍ମଶାନ ଯାଏଁ
ଜୀବନ ବିତଇ ଶିକ୍ଷାରେ ।
ବାପମାଆ ଆମ ପ୍ରଥମ ଶିକ୍ଷକ
ତାଙ୍କଠାରୁ ଭାଷା ଶିଖିଲୁ,
ତାଙ୍କ ହାତ ଧରି ଠୁକୁ ଠୁକୁ ଚାଲି
ଗାଆଁ ଦାଣ୍ଡେ ଦୌଡି ଚାଲିଲୁ ।
ବିଦ୍ଯାଳୟ ଗଲୁ ଶିକ୍ଷା ଲାଭ କଲୁ
ଶିକ୍ଷକ ଗୁରୁଜୀ ଆମର,
ତାଙ୍କର ଶିକ୍ଷାରେ ଦୁନିଆଁ ଚିହ୍ନିଲୁ
ଶିକ୍ଷା ବିନା ସବୁ ଅନ୍ଧାର ।
ତାଙ୍କର ନିର୍ଦ୍ଦେଶ ଉପଦେଶ ବାଣୀ
ଜୀବନର ଦିଗ୍ ଦର୍ଶନ,
ଶିକ୍ଷକ ବିନା ଦୁନିଆ ଅସାର
ଜୀବନେ ଆସଇ କଷଣ ।
ପିତାମାତା ଏବଂ ଶିକ୍ଷକ କରନ୍ତି
ଆମର ଚରିିତ୍ର ନିର୍ମାଣ,
ସତ୍ ପଥେ ଚାଲି ଦେଶ ସେବା କରି
ଜୀବନେ ହେଉଛୁ ମହାନ ।
ମଣିଷ ସମାଜ ଗଢି ସେ ତୋଳନ୍ତି
ଶିକ୍ଷା ଦାନ କରି ସର୍ବଦା,
ତାଙ୍କ ଅବଦାନ ଅବିସ୍ମରଣୀୟ
ଗୁରୁଦେବ ତାଙ୍କ ମର୍ଜାଦା ।
ଆଜି ଆମେ ଯେଉଁ ପଦେ ପ୍ରତିଷ୍ଠିତ
ଡାକ୍ତର, ବିଜ୍ଞାନୀ, ଶିକ୍ଷକ,
ଇଂଜିନିୟର, ଅଫିସର, କିରାଣୀ
ମନ୍ତ୍ରୀ ଅବା ଦେଶନାୟକ ।
ସେ ସବୁୁ ତାଙ୍କର ଶିକ୍ଷାର ପ୍ରଭାବ
ଚିରରୂଣୀ ଆମେ ତାଙ୍କର,
ତାଙ୍କ ଅବଦାନ ସମାଜେ ମହାନ
ଚିରନମସ୍ଯ ସେ ଆମର ।
ଶିକ୍ଷା ଜଗତରେ ଅଶିକ୍ଷା ନ ପଶୁ
ଶିକ୍ଷକ ପାଆନ୍ତୁ ଆଦର,
ଯୁଗ ନିର୍ମାଣର କାରୀଗର ସିଏ
ଅମୂଲ୍ୟ ଧନ ସେ ଦେଶର ।