ଜେଜେବାପା

ଜେଜେବାପା ଆମ  ସ୍ନେହର ସାଗର

   ସଭିଏଁ ତାଙ୍କର ନିିିଜର,

ବାପାଙ୍କ ଦେବତା  କହି ମିଠା କଥା

   କରନ୍ତି ସଭିିିଙ୍କୁ ଆଦର ।

ଜୀବନ ପଥର  ଅଭିଜ୍ଞତା ନେଇ

  ଆମ ପାଇଁ ଜଣେ ଶିକ୍ଷକ, 

ତାଙ୍କର ଆଦେଶ  ଉପଦେଶ ସବୁ

   ଆମ ପାଇଁ ଅଟେ ରକ୍ଷକ ।

ନାତି ନାତୁଣୀଙ୍କ   ଅତି ପ୍ରିୟ ସିଏ

  ଖେଳି ଖେଳାନ୍ତି ସେ ସଙ୍ଗରେ,

କେତେ ନୀତି ବାଣୀ  ଶୁଣାଇ ସଭିଙ୍କୁ

   ସଜାଡି ଜୀବନ ଢଙ୍ଗରେ ।

 

ପରିବାରର ସେ  ମୂଖିଆ ହଲେ ବି

   ମନରେ ନ ଥାଏ ଗରବ,

ନିଜର ସ୍ବାର୍ଥକୁ  ନ ଭାବି ମନରେ

   ଜଳାଞ୍ଜଳି ଦେଇ ସରବ ।

କହନ୍ତି ବାବୁରେ  ସୁଖେ ବଞ୍ଚିଥାଅ

  ମୋ ଦିନ କାଳ ତ ଗଲାଣି,

ତୁମ ମାନଙ୍କର  ଖୁସି ଓ ସୁଖରେ

   ସଂସାରୁ ନେବି ମୁଁ ମେଲାଣି ।

 

ତାଙ୍କର ଶୁଶ୍ରୁଷା କରିବା ଆମର

   ଅଟଇ ପରମ ଧରମ,

ବାପାଙ୍କର ବାପା  ସାକ୍ଷାତ ଈଶ୍ବର 

   ପୂଜି ଧନ୍ଯ ହେବ ମାନବ ।

 

ପାର୍ଥିବ ଜଗତେ  ଆଜିର ସଭ୍ୟତା 

   ବସ୍ତୁବାଦୀ ହୋଇ ଗଲାଣି,

ମାନବ ସମ୍ପର୍କେ  ସମ୍ମାନ ଶ୍ରଦ୍ଧାର

   ମୂଲ୍ୟକୁ ହରାଇ ଦେଲାଣି ।

ଅର୍ଥକୁ ସର୍ବସ୍ବ  କରି ଏ ମଣିଷ 

   ଭାରି ସ୍ବାର୍ଥପର ହେଲାଣି,

ବୃଦ୍ଧ ବାପ ମାଆ  ବୃଦ୍ଧାଶ୍ରମେ ରଖି

   ମାନବତା ହତ୍ଯା କଲାଣି ।