ଶିକ୍ଷକ ଦିବସ

ଶିକ୍ଷକ ଦିବସ ଛୁଟି ହେଲେ ହେଉ ଶିକ୍ଷକ ପାଇବେ ପୂଜା,

ଫୁଲତୋଡ଼ା ମିଠା, କଲମ ପାଇବେ ମାଗଣାରେ ସୁଖ-ମଜା ।

ଶିଶୁ ଦିବସରେ ଛୁଟି ହୋଇଯାଏ ଦେବାକୁ ପଡ଼େନା କିଛି,

ଚତୁର ଶିକ୍ଷକ ଟିଉସନ ନାମେ ଶୋଷଣ କରନ୍ତି ବାଛି ।

ସେଦିନର ଗୁରୁ ଗଲେଣି କେବେଠୁ ଏବେ ଦିଅ ଆଉ ନିଅ,

ଟିଉସନ କଲେ ଅଧିକ ନମ୍ବର ନ କଲେ ପଛରେ ଥାଅ ।

କେଉଁ ଗୁରୁ କେଉଁ ନିଶାରେ ଥାଆନ୍ତି ପିଲାଏ ପାରନ୍ତି ଜାଣି,

କହିବାକୁ ଲାଜ କାହାକୁ କହିବେ ଶିଶୁ ଅସହାୟ ପ୍ରାଣୀ ।

ଗୁରୁ ଦିବସରେ ନାନା ଉପହାର ମିଠାର ପୁଡ଼ିଆ ଏତେ,

କଲମ ବସ୍ତାକୁ ବ୍ୟବହାର ପାଇଁ ଲାଗିବ ବରଷ କେତେ !

ଆଜିର ଶିକ୍ଷକ ଗୁରୁ ଭାବେ ପୂଜା ପାଇବାକୁ କରେ ଦାବି,

ହାତ ଆଙ୍ଗୁଳିରେ ଗଣିଲେ ମିଳିବେ, କୁହନ୍ତୁ ଟିକିଏ ଭାବି ।