ଶିଖିବା
ଶିଖିବା
କୁକ୍କୁଟଠୁ ଶିଖ ଉଷାରୁ ଉଠିବା
ଭାନୁଠୁ ସମୟ ଜ୍ଞାନ,
ପବନଠୁ ସମାଦର ବାର୍ତ୍ତା ନିଅ
ବଗ ଠାରୁ ଶିଖ ଧ୍ୟାନ ।। ୧
ଶ୍ୱାନ ଠାରୁ ପ୍ରଭୁ ଭକ୍ତ ହେବା ବୃକ୍ଷ
ଠାରୁ ପରୋପକାରିତା,
ସଞ୍ଚୟ କରିବା ପିମ୍ପୁଡ଼ିଠୁ ଶିଖ
ଆକାଶରୁ ଉଦାରତା ।। ୨
ବଦାନ୍ୟତା ଶିଖ ନଦୀ ପୁଷ୍କରୀଠୁ
ଧରାଠୁ ସହନ ଗୁଣ,
ପରିଶ୍ରମୀ ହେବା ପକ୍ଷୀଠୁ ଶିଖିବା
ଚନ୍ଦ୍ରଠୁ ଶୀତଳ ପଣ ।। ୩
ଫଳ ପୂର୍ଣ୍ଣ ବୃକ୍ଷୁ ବିନମ୍ରତା ଶିଖ
ପ୍ରକୃତିଠୁ ସଞ୍ଜମତା,
ସାଗରଠୁ ଶିଖ ଫେରାଇବା ପଣ
ମାତାଠୁ ଶିଖ ମମତା ।। ୪
ନିଜ ସଙ୍କଳ୍ପରେ ଅଟଳ ରହିବା
ଅଚଳଠୁ ନିଅ ଶିଖି,
ନିଜେ ଜଳି ଆନେ ତେଜ,ଓଜ ଦେବା
ପ୍ରଦୀପଠୁ ଶିଖ ଦେଖି ।। ୫
ଫୁଲ ଠାରୁ ଶିଖ ସୁରଭି ବାଣ୍ଟିବା
ମଧୁପଠୁ କୃପଣତା ,
ପ୍ରଜାପତି ଠାରୁ ପ୍ରଫୁଲ୍ଲତା ନିଅ
ଶିଶୁ ଠାରୁ ସରଳତା ।। ୬
ସ୍ଵାଭିମାନୀ ଗୁଣ ସିଂହ ଠାରୁ ନିଅ
ସାଧୁଠୁ ନିଃସ୍ଵାର୍ଥ ଭାବ,
ଜଳ ପରି ପ୍ରତି ପାତ୍ରେ ଢଳି ଗଲେ
ବଞ୍ଚିବା ସହଜ ହେବ ।। ୭
ଜ୍ଞାନ ଅର୍ଜନର ସୀମା ନାହିଁ ପୁଣି
ନାହିଁଟି ସମୟ ଭେଦ,
ଭଲ ଗୁଣ ସବୁରିଠୁ ଗ୍ରହଣୀୟ
ଶିଶୁ ହେଉ ଅବା ବୃଦ୍ଧ ।। ୮