ଅକ୍ଷୟ ତୃତୀୟା
ଅକ୍ଷୟ ତୃତୀୟା
ବର୍ଷ ଅନୁକୂଳ ବିଷୁବ ସଂକ୍ରାନ୍ତି
ଚାଷ ଅନୁକୂଳ ଅକ୍ଷି ତୃତୀୟା,
ଏହି ଦିନୁ ହୁଏ ରଥ ଅନୁକୂଳ
ରଥ ଖଳାରେ ନିର୍ମାଣ ପ୍ରକ୍ରିୟା ।। ୧
ଅତି ସରାଗରେ ସେଦିନ କୃଷକ
ଅକ୍ଷୟ ମୁଠିକୁ ଯତନେ ବାଢି,
ଅକ୍ଷୟ ଅନ୍ନ ଯାଚନାରେ ପୂଜଇ
ଧରଣୀ ମାତାଙ୍କ ଚରଣେ ପଡ଼ି ।। ୨
କ୍ଷେତ୍ର କରଷଇ ନୂଆ ଆଶା ନେଇ
ନୂଆ ବୀଜ ବୁଣି ଲଭଇ ତୃପ୍ତି,
ଉତ୍ତମ ଫସଲ ଯାଚନାରେ ପୂଜେ
ଭକତି ଭରେ ମାତା ବସୁମତୀ ।। ୩
ଘୋଷ ଯାତ୍ରା ପାଇଁ ଏହି ଦିନ ହୁଏ
ନୂଆ ରଥ ନିର୍ମାଣ ଆୟୋଜନ,
ଆଜ୍ଞା ମାଳ ନେଇ ରଥ ଖଳା ଠାରେ
ଆରମ୍ଭ ହୁଅଇ ରଥ ନିର୍ମାଣ ।। ୪
ଏହି ଦିନ ମହା ପରାକ୍ରମୀ ମହା
ତେଜବନ୍ତ ପର୍ଶୁରାମଙ୍କ ଜନ୍ମ,
ବ୍ରହ୍ମ ବେତ୍ତା ବ୍ରହ୍ମ ତେଜେ ଯିଏ ଦିନେ
ବ୍ରାହ୍ମଣ କୁଳ କରିଥିଲେ ଧନ୍ୟ ।। ୫
କ୍ଷତ୍ରିୟଙ୍କ ଦଉରାତ୍ମ୍ୟରେ ଅଧିର
ହେଉଥିଲା ଯେବେ ଧରଣୀ ରାଣୀ,
ବାର ବାର କରି ଏକୋଇଶି ବାର
ନିକ୍ଷତ୍ରିୟ କରିଥିଲେ ଧରଣୀ ।। ୬
ଏହି ଶୁଭ ଦିନେ ଜନ୍ମି ଥିଲେ ଦିନେ
ଶ୍ରୀ ଜୟଦେବ କେନ୍ଦୁଲି ଗ୍ରାମରେ,
ସଂସ୍କୃତରେ ରଚି ଶ୍ରୀ ଗୀତଗୋବିନ୍ଦ
ଅକ୍ଷୟ କୀର୍ତ୍ତି ରଖିଲେ ଧରାରେ ।। ୭
ହିନ୍ଦୁ ସଂସ୍କୃତିରେ ବିଶ୍ୱାସ ରହିଛି
ଏହି ଦିନ ଯାହା ଆରମ୍ଭ ହୁଏ,
ସଫଳତା ଲାଭ କରଇ ଅବଶ୍ୟ
ଅକ୍ଷୟ ହୋଇ ତା ଜଗତେ ରହେ ।। ୮