ଶୀତରେ ଶୀତରେ
ଶୀତରେ ଶୀତରେ
ଶୀତରେ ଶୀତରେ ମାଈ କାକରରେ
ବିଲକାମ ସାରି ହରି
ଫେରୁଥିଲା ଘରେ ମୁହଁ ସଞ୍ଜବେଳେ
ଖୋଲା ଦେହେ ଥରି ଥରି |
ଯାଉ ତରତରେ ଗାଆଁ ମୁଣ୍ଡ ଘରେ
ଦେଖିଲା ଜଳୁଛି ନିଆଁ
ସେକି ହେବାପାଇଁ ଭିତରକୁ ଯାଇ
ନିଆଁ ପାଶେ ହେଲା ଠିଆ |
ଦେଖିଲା ସୁନ୍ଦରୀ ବାଳା ସୁକୁମାରୀ
ସରଗ ରାଇଜ ପରୀ
ଘଷି ନିଆଁ କରେ ଅତି ଯତନରେ
ଫୁଙ୍କି ଫୁଙ୍କି ତାଉ କରି |
ହରିଆକୁ ଦେଖି ସାରିଆ ସୁମୁଖୀ
ଲାଜରେ ପଳାଉ ଉଠି
ଆସି ବୁଢ଼ୀମାଆ ଦେଖିଲା ହରିଆ
ଥର ଥର ଥରୁଅଛି |
ଆରେ ବାପଧନ ବସରେ ଵହନ
ନିଆଁ ପୁଅଁ ମନଭରି
ଏମିତି ଶୀତରେ ବିନା ପୋଷାକରେ
କେଣେ ଯାଇଥିଲୁ ହରି |
ବସୁ ନିଆଁ କତି ବୁଢ଼ୀ ଦିଏ ସେକି
ଗେଲରେ ଆଦର କରି
ଚେହେରା ବଳିଷ୍ଠ ଗଜୁରିଆ ନିଶ
ଯବାନ ଦେଖି ସୁନ୍ଦରୀ |
ନିଜର ଚାଦର କାଢ଼ି ଖରତର
ହରିକୁ ଦେଲା ଘୋଡ଼ାଇ
ଚାହାଁନ୍ତେ ହରିଆ ଦେଖିଲା ସାରିଆ
ମୃଦୁ ହାସେ ଅଛି ରହି
ଚାରି ଚକ୍ଷୁ ଯେବେ ମେଳ ହେଲା ତେବେ
ବହିଲା ପ୍ରେମର ନଈ |
ଲଗାଲଗି ହୋଇ ବସିଗଲା ବାଳା
ନିଆଁ ପୁଆଁ ବାହାନାରେ
ଲୁହାକୁ ଚୁମ୍ବକ ମଣିରେ କନକ
ଯୋଡିହେଲା ପରକାରେ |
ବୁଢୀମା ଚତୁରୀ ତୁରନ୍ତ ବାହାରି
ଗଲା ସଉଦାର ଆଳେ
ପହିଲି ପ୍ରେମର ଅମୀୟ ପରଶ
ଲଜ୍ଜା ଗଲା ପରପାରେ |
ପ୍ରେମ ରାଇଜର ବାହ୍ୟ ଉପଚାର
ସାରିଦେଲେ ପରସ୍ପରେ |
ବିଭା ହେବା ପାଇଁ ରାଜି ରୁଜା ହୋଇ
ହରିଆ ଫେରିଲା ଘରେ
ମାସକ ଭିତରେ ବାହାଘର ହେଲା
ସରଳ ନିରାଡ଼ମ୍ବରେ |