ମୁଁ ତୁମର ତୁମେ ମୋର
ମୁଁ ତୁମର ତୁମେ ମୋର
ମୁଁ ତୁମର ତୁମେ ମୋର
=============
ପ୍ରୀତି ପଥ ବଡ ଖସଡା ସଜନୀ
ଥରେ ଗୋଡ ଖସିଗଲେ
ନିନ୍ଦା ଅପବାଦ ସହିବାକୁ ପଡେ
ଜାଣିଥା ଏହା ତୁ ଭଲେ ॥
ପ୍ରେମ ତ କରୁଛ କାହାକୁ ଡରୁଛ
ଡରିଗଲେ ଯିବ ମରି
ପ୍ରେମରେ ପଡିଲେ ଡର ଭୟ ସବୁ
ଛାଡିବାକୁ ହୁଏ ଗୋରୀ ॥
ହୃଦୟ ଦେଇଛ ମୋ ପ୍ରେମେ ପଡିଛ
ଜାଣେ ମୁଁ ତୁମର ମନ
ଜୀବନର ପଥେ ରହିବି ମୁଁ ସାଥେ
ପ୍ରତିଦିନ ପ୍ରତିକ୍ଷଣ ॥
ନିରବେ ବସିଛ କିମ୍ପାଇ ଗୋ ପ୍ରିୟା
ବିରସ ମନରେ ଆଜ
ମୋ ପାଖରେ ଖୋଲି କହିବାକୁ କିଆଁ
କରୁଅଛ ଆଜି ଲାଜ ॥
ତୁମେ ଇଚ୍ଛା କଲେ ତୋଳି ଆଣିଦେବି
ଆକାଶରୁ ଚାନ୍ଦ ତାରା
ଭରି ଦେବି ତୁମ ଅଞ୍ଜଳିରେ ପ୍ରିୟା
ସୁନା ରୂପା ମୋତି ହୀରା ॥
ଜହ୍ନରୁ ଆଣିବି ଜୋଛନା ଗୋ ପ୍ରିୟେ
ତୁମ ମୁଖ ଚନ୍ଦ୍ର ପାଇଁ
ଫୁଲରୁ ସୁଗନ୍ଧ ଆଣି ତୁମ ଅଙ୍ଗେ
ଦେବି ସରାଗେ ଲଗାଇ ॥
କୋଇଲିଠୁ ନେବି କଳା ରଙ୍ଗ ପ୍ରିୟେ
ରଙ୍ଗାଇବି ତୁମ କେଶ
ମୟୂରର ମନ ନେଇ ନିଶି ଦିନ
ରହିଥିବି ତୁମ ପାଶ ॥
ସଜଳ ଜଳଦ କଜ୍ଜଳ ରଙ୍ଗରେ
ନୟନ ଦେବି ସଜେଇ
ବଧୁଲି ଅଧର ଧାରେ ତୁମ ହସ
ଝରୁଥିବ ମୁକ୍ତା ହୋଇ ॥
ତୁମ ପାଇଁ ପ୍ରିୟା ଆକାଶ ପାତାଳ
ସପ୍ତତଳ ଏକାକାର
କରିପାରେ ଯଦି କହିଦିଅ ଥରେ
"ମୁଁ ତୁମର ତୁମେ ମୋର" ॥