ଶିବରାତ୍ରି

ଏଇ ଚତୁର୍ଦ୍ଦଶୀ ଅନ୍ଧାର ରାତିରେ 

ପୂଜା କରିବି ମୁଁ ଭକତି ଚିତ୍ତରେ 

ପ୍ରଦୀପ ଜଳାଇ ଜୀବନୁ ଅନ୍ଧାର 

ଲୁପ୍ତ ମୁଁ କରିବି ଜୀବନ ଯାକର ।

ଦେବତା ପୂଜନ ପୂଣ୍ୟ ଅରଜନ 

ମଣିଷ ମାତ୍ରକେ ନ ହୋଇବ ଆନ 

ଦୂର ଦେବାଳୟ ପ୍ରଭୁଙ୍କ ଆଳୟ

ଭୋଗ ଥାଳି ଧରି ଜିବାକୁ ଅଥୟ ।

ଜାଳିବି ଯାଗର ହୋଇ ଉଜାଗର 

ଭକ୍ତିପୁତ ମନେ ପୂଜିବି ଶଙ୍କର  

ଆହୁତି ଦେବି ମୁଁ ପ୍ରତ୍ୟେକ ପ୍ରହର 

ପାଇବି ପ୍ରଭୁଙ୍କ ଅଭୟ ଯେ ବର ।

ମନର ପ୍ରଦୀପ ପ୍ରଜ୍ଜଳନ କରି 

ପୂଜିବି ଶିବ ମୁଁ ମନରେ ମୋହରି

ମନମଧ୍ୟେ ବିଜେ ଶ୍ବୟମ୍ବୁ ଶଙ୍କର 

ଏ ଜୀବନ ପରା ଦାନ ପ୍ରଭୁଙ୍କର ।

ଆଖି ଧୁପକାଠି ହୃଦୟ ଆଳତୀ 

ଦେହମୋର ପୁଷ୍ପ ଅର୍ପଣ କରିଛି 

ପାଇ ପୂଣ୍ୟଫଳ ହେବି ପୂଣ୍ୟବତୀ

ଅର୍ଘ୍ୟ ପ୍ରଦାନ କରିବି ନିତିନିତି ।