ଶିବଧନୁ ଭାଙ୍ଗିଲା କିଏ?

ସ୍କୁଲ ଇନ୍ସପେକ୍ଟର ନାମ ନାରାୟଣ ପାଣି l

ଭାରି କଡ଼ାଲୋକ ତାଙ୍କ ବିଚିତ୍ର ଚାହାଣି ll

ସ୍କୁଲ ପରିଦର୍ଶନରେ ଯେ ଆଡ଼େ ଯାଆନ୍ତି l

ଛାତ୍ରେ ଶିକ୍ଷକେ ସମସ୍ତେ ପ୍ରମାଦ ଗଣନ୍ତି ll

ଦିନେ ପହଞ୍ଚିଲେଯାଇ ବାବୁ ଗୋଟେ ସ୍କୁଲ l

ତାଙ୍କ ପାଇଁ ଉପସ୍ଥାନ ଥିଲା ପୁରା ଫୁଲ୍ ll

ପହଁଚିଲେ ବାବୁ ଯାଇ ଏକାଦଶ ଶ୍ରେଣୀ l

ପ୍ରଶ୍ନଟିଏ ଛାଡ଼ିଦେଲେ ରାମାୟଣୁ ଆଣି ll

ପିଲେ କୁହ ଶିବଧନୁ କିଏ ସେ ଭାଙ୍ଗିଲା l

ପ୍ରଶ୍ନ ଶୁଣି ଠରାଠରିହେଲେ ସବୁ ପିଲା ll

ବାବୁ ପଚାରନ୍ତି ଛାତ୍ରେ ଏକ, ଏକ ଚାହିଁ l

ପିଲାଏ କହନ୍ତି ଆଜ୍ଞା ମୁହିଁ ଭାଙ୍ଗି ନାହିଁ ll

ଶେଷରେ ପ୍ରଶ୍ନ କରନ୍ତେ କକ୍ଷ ପ୍ରଥମକୁ l

ନାହିଁକରେ କଣ୍ଠ ଶୁଖି ପାଟି ପାକୁପାକୁ ll

ଶିକ୍ଷକ ଚିନ୍ତିଲେ ବଡ଼ ପ୍ରମାଦ ହୋଇଲା l

ଶିବଧନୁ ଭାଙ୍ଗିଲା, ବାବୁଙ୍କ କିସ ଗଲା ll

ଶେଷରେ ସମ୍ପାଦକଙ୍କ କାନେ କଥାପଡ଼ି l

ସ୍କୁଲକୁ ଆସିଲେ ସିଏ ଧାଇଁ ଉଠି ପଡ଼ି ll

ପାଣି ବାବୁଙ୍କୁ କହିଲେ ଅନେକ ବୁଝାଇ l

ଶିବ ଧନୁ ଭଙ୍ଗା ପାଇଁ ଚିନ୍ତା କର ନାହିଁ ll

ଭାଙ୍ଗିଛି ଯେ ଶିବଧନୁ ସେ ଦୁଷ୍ଟ ଦୂର୍ଦ୍ଦଣ୍ଡ l

ପୋଲିସରେ କହି ତାକୁ ଦିଆଇବୁ ଦଣ୍ଡ ll

ଶିବଧନୁ ଗଳ୍ପ ଯେବେ ବାବୁ ବାଖାଣିଲେ l

ଦାଣ୍ଡ ଫାଟିପଡ଼େ ସର୍ବେ କୁରୁଳି ହସିଲେ ll