ଶେଷ ପଥ ଜଗନ୍ନାଥ
ଶେଷ ପଥ ଜଗନ୍ନାଥ
ଜୀବନର ଚଲା ପଥେ ଭାଇ ବନ୍ଧୁ
ପୁଣି ସଖା ସହୋଦର
ସୁଖରେ ଦୁଃଖରେ ଆଗରେ ପଛରେ
ଭେଟ ହୁଏ ବାରମ୍ବାର
ପଥ ଶେଷ ଅବା ଶେଷ ପଥ ଜାଣି
ଆପେ ଆପେ ଯିବେ ଦୂରେ
ଅଙ୍ଗ ଅବୟବ ନ ହେବ ସମର୍ଥ
ନିଜ ପଥ ଖୋଜିବାରେ
ଶେଷ ପଥ ଯାତ୍ରୀ ମାତ୍ର ଜଗନ୍ନାଥ
ସ୍ମରଣ ରହୁ ହୃଦରେ
କୈବଲ୍ୟ ର ରେଣୁ ନିର୍ମାଲ୍ୟ ଆକାରେ
ଜୀବ ଯିବା ସମୟରେ ।
ସ୍ଵର୍ଗଦ୍ଵାର ଅବା ମଶାଣି ଭୂଇଁ ରେ
ଦେହ ରଥ ଅଟକିବ
ରାମ ନାମ ସତ୍ୟ ହରି ନାମ ସତ୍ୟ
ଚାରି ପାଖେ ଶୁଭୁ ଥିବ
ନିଃଶ୍ୱାସ ସହିତ ବିଶ୍ୱାସ ତୁଟିଲେ
ନିଃଶ୍ୱାସ ର ପଥ ଶେଷ
କ୍ଷଣ ଭଙ୍ଗୁର ଏ ମଣିଷ ଜୀବନ
ହୃଦେ କିମ୍ପା ହିଂସା ଦ୍ୱେଷ ।
ଜୀବନ ନାଟକେ ଶେଷ ଦୃଶ୍ୟ ପରେ
ମଞ୍ଚ ଅନ୍ଧାର ହୋଇବ
ଅଭିନୟ ପ୍ରତି ପ୍ରଶଂସା ର ସୁଅ
ସେଇଠି ଅଟକି ଯିବ
ଜୀବ ପ୍ରତି ଦୟା ନାମରେ ବିଶ୍ୱାସ
ପରୋପକାର ସେବାରେ
ଉତ୍ସର୍ଗୀତ ହେଉ କ୍ଷଣିକ ଜୀବନ
ମାନବିକତାର ଧାରେ
ରଥ ପଥ ଜଗନ୍ନାଥ ର ରହସ୍ୟ
ଜୀବନ ସହ ଜଡ଼ିତ
ଜୀବନ ରୂପକ ରଥ ଯାତ୍ରା ପଥେ
ଶେଷ ପଥ ଜଗନ୍ନାଥ ।