Library
ଶେଷ ଫଗୁଣର ଚିଠି
ଶେଷ ଫଗୁଣର ଚିଠି
ଦୂରେ ବହୁଦୂରେ ସାତ ସିନ୍ଧୁପାରେ
ରହିଗଲ ପ୍ରାଣପ୍ରିୟ
ବିରହି ଚକୋରି ତୁମ ମୁଖଚନ୍ଦ୍ର
ଝୁରିହୁଏ ଅହରହ |
ନିଦାଘର ଘର୍ମ ନିବାରଣେ ତୁମେ
ଶୀତଳ ଚନ୍ଦନ ସମ
ବର୍ଷଣମୁଖର ଭିଜା ବରଷାର
ପ୍ରେମଘନ କୋଟି କାମ |
ଶୁଭ୍ର ଶରତର ଚନ୍ଦ୍ରିକା ଚର୍ଚ୍ଚିତ
ତୁମେ ମୋ ବିମଳ ଜହ୍ନ
ଶିଶିର ଶୀତର ମୁକ୍ତାଭ କାକର
ପ୍ରଣୟର ରସଘନ |
ନବ ବିବାହିତା ରମଣ ଆସକ୍ତା
ଜଳୁଛି ବିରହାନଳେ
ଦେଖୁଥିଲି ସ୍ୱପ୍ନ ଆସିବ ମୋ ପ୍ରିୟ
ମଧୁ ଋତୁ ଅବସରେ |
ସଜାଇଲି ମୋର ଅଙ୍ଗ ବଲ୍ଳରୀକୁ
ତୁମ ପ୍ରେମ ଅଭିସାରେ
କାଉ ବୋବାଇଲେ ନେଉଳ ଦେଖିଲେ
ହଜିଯାଏ ଆନନ୍ଦରେ |
ସପନ ମିନାର ହେଲା ଚୁରମାର
କୋଭିଡି ଚିହ୍ନିତ ହୋଇ
ଡାକ୍ତରଖାନାର ଭୂମି ଶେଯେ ରହି
ମୃତ୍ୟୁ ସଙ୍ଗେ ଲଢୁଥାଇ |
ଥରଥର ହାତେ ଲେଖୁଛି ପତର
ଲୁହଭିଜା କଲମରେ
ଯହିଁ ତୁମେ ଥାଅ ଭଲରେ ହିଁ ଥାଅ
ଏତିକି କାମନା କରେ |
ଦଇବ ଦଉଡି ମଣିଷ ତ ଗାଈ
ଯେଣିକି ଟାଣେ ସେ ଯାଏ
ବଞ୍ଚିବିକି ସତେ ମନେ ନାହିଁ ପ୍ରତେ
ତୁମ ଆଗମନ ଚାହେଁ |
ଶେଷ ଫଗୁଣର ଏହି ଶେଷ ଚିଠି
ସାହା ନୀଳଗିରି ସାଇଁ
ଜନମେ ଜନମେ ତୁମେ ମୋର ପ୍ରିୟ
ତୁମେ ଦେହ ମୁହିଁ ଛାଇ |
