ଶେଷ ଫଗୁଣର ଚିଠି

ହଜି ତ ଗଲଣି ମଳୟ ସମୀର

ଡହକୁଛି ଖରା ଝାଞ୍ଜି

ତରୁ ଶାଖା ଡାଳେ ଦେଖା ଯାଉ ନାହିଁ

ହଳଦୀ ବସନ୍ତ ଯୋଡ଼ି ।

ନାହିଁ ଆମ୍ର କୁଞ୍ଜ ବଉଳ ସୁବାସ

ଶୁଭୁ ନାହିଁ କୁହୁକୁହୁ

ଲେଖିଲିଣି ବହୁ ପତ୍ର ତ ତୁମକୁ

ଉତ୍ତର ମିଳୁନି ଆଉ ।

ଆମରି ଗାଁରେ ବସନ୍ତ ମିଳନ

ଦୋଳ ପୂର୍ଣ୍ଣିମା ପରବ

ହେଉ ନାହିଁ ଏବେ ଜାକଯମକରେ

ହୋରିଖେଳ ଫିକାରଙ୍ଗ ।

ଝଲସୁନି ରାଧାକୃଷ୍ଣଙ୍କ ବିମାନ

ତାରକସି ରୁପା କାମ

ଉଛୁଳୁନି ହରିବୋଲ ହୁଳହୁଳି

କୃଷ୍ଣ ନାମ ସକୀର୍ତ୍ତନ ।

ବଡ଼ ଦୁଖଃ ଲାଗେ ଦେଖି ପୁଣ୍ୟ ସ୍ଥାନ

ସାମ୍ପ୍ରତିକ ଦୁରାବସ୍ଥା

ଲଙ୍ଘିଛି ମଣିଷ ସୀମା ସରହଦ

ମାନୁନାହିଁ ବି ଦେବତା ।

ନାହିଁ ଆଉ ଆଗ ଭାବ ବା ବିଶ୍ୱାସ

ସ୍ୱର୍ଗୀୟ ଭାବନା ପ୍ରେମ

ମାନୁନାହିଁ ଲୋକ ସ୍ଥାନ କାଳ ପାତ୍ର

ଗୁରୁଜନ ଲଘୁଜନ ।

ଦେଖାଇ ହୁଅନ୍ତି ଜଗତେ କେବଳ

ବାହାରକୁ ଚାକଚକ୍ୟ

ଅନ୍ତରରେ ଭରା ବିଷ ହଳାହଳ

ରାଗ ଦ୍ୱଷ ହି୦ସା କୂଟ ।

ରହିଛି ମଉନେ ବିଷାଦ ମନରେ

ହୃଦୟ ଯାଉଛି ଫାଟି

ଜଣାଉଛି ପ୍ରିୟ ମରତ ଲୋକରୁ

ଶେଷ ଫଗୁଣର ଚିଠି ।