ସହଧର୍ମିଣୀ

ଅପେକ୍ଷା କରି ତୁମ ନୀଳକଇଁ ବହୁ ଯୁଗରୁ 

ତୋଳିଲେ ତ ବାଲିଘର ବାହାଘର ଦିନରୁ

ଏହି ସଂସାରରେ, ତାର ସରିହେଵ କିଏ ?

ମୋ ସହଧର୍ମିଣୀ ତ ସିଏ  ।୧।

ସୁଖରେ ଦୁଃଖରେ, ଭଲରେ ମନ୍ଦରେ,

ଛାଇ ପରି ରହେ ମୋ ଚଲା ପଥରେ,

ଏହି ସଂସାରରେ, ତାର ସରିହେଵ କିଏ ?

ମୋ ସହଧର୍ମିଣୀ ତ ସିଏ  ।୨।

ତାର ସରଳ ଚପଳ ମତି, ହୀରକ ପରାୟ କାନ୍ତି,

ପାଖେ ରହିଥିଲେ, ମନରେ ନ ଥାଏ ତ କିଛି ଭ୍ରାନ୍ତି

ଏହି ସଂସାରରେ, ତାର ସରିହେଵ କିଏ ?

ମୋ ସହଧର୍ମିଣୀ ତ ସିଏ ।୩।

ମୋ ମନର ସ୍ନେହ ପ୍ରଦାୟିନୀ, ମନ୍ତ୍ରଣା ଦାୟିନୀ

ମୋର ପ୍ରେରଣା ଦାୟିନୀ, ମୋର ତ ଅର୍ଦ୍ଧାଙ୍ଗିନୀ

ଏହି ସଂସାରରେ, ତାର ସରିହେଵ କିଏ ?

ମୋ ସହଧର୍ମିଣୀ ତ ସିଏ  ।୪।

ସେ ତ ମନଲୋଭା ମୋ ପାଇଁ ଅତୀବ ସୁନ୍ଦର

କହିପାର ତୁମେ ସିଏ ତ ମୋର ମନ ଚୋର,

ଏହି ସଂସାରରେ, ତାର ସରିହେଵ କିଏ ?

ମୋ ସହଧର୍ମିଣୀ ତ ସିଏ  ।୫।

ଶାସ୍ତ୍ର ଅନୁସାରେ ସେ ମୋର ସାଥୀ ସାତ ଜନମକୁ 

କାୟା ସହ ଛାୟା ପରି, ପ୍ରଫୁଲ୍ଲିତ କରେ ମନକୁ

ଏହି ସଂସାରରେ, ତାର ସରିହେଵ କିଏ ?

ମୋ ସହଧର୍ମିଣୀ ତ ସିଏ  ।୬।

ମୋ ସାବିତ୍ରୀ, ସତୀ ଅନସୂୟା ସଦୃଶ ଲୟ ଥାଏ

କୁପଥରେ ଗଲେ ପାଦେ ପାଦେ ସୁପଥ ଦେଖାଏ

ଏହି ସଂସାରରେ, ତାର ସରିହେଵ କିଏ ?

ମୋ ସହଧର୍ମିଣୀ ତ ସିଏ ।୭।

ଘରର ସମସ୍ତ ଯତନ ନିଏ, ଘରର ଗୃହଲକ୍ଷ୍ମୀ ସିଏ

ଆମର ଦୁଇଟି ଆତ୍ମା ସିନା କିନ୍ତୁ ଆମ ହୃଦୟ ଗୋଟିଏ

ଏହି ସଂସାରରେ, ତାର ସରିହେଵ କିଏ ?

ମୋ ସହଧର୍ମିଣୀ ତ ସିଏ  ।୮।

କଷ୍ଟ ସହି ଶିଶୁକୁ ପାଳନ୍ତି, ବାତ୍ସଲ୍ୟ ଭାବକୁ ନେଇ

ଶିଶୁ ହିଁ ତାଙ୍କ ହୃଦୟ ସ୍ପନ୍ଦନ ଆଶା ଆଲୋକକୁ ନେଇ 

ଏହି ସଂସାରରେ, ତାର ସରିହେଵ କିଏ ?

ମୋ ସହଧର୍ମିଣୀ ତ ସିଏ ।୯।

ମୋ ପାଇଁ ତା ମନରେ ନରହେ ତିଳେ ମାତ୍ର ଛଳନା,

ପ୍ରେମକୁ ତାହାର କାହା ସହ ହୋଇ ପାରେନା ତୁଳନା

ଏହି ସଂସାରରେ, ତାର ସରିହେଵ କିଏ ?

ମୋ ସହଧର୍ମିଣୀ ତ ସିଏ  ।୧୦।