ଶାଶୁଘର

ଓଢଣା ତଳରୁ ଲାଜ ଭରା ମୁଖେ,

ଦେଖେ ସାମ୍ନାର ନୂଆ ସମ୍ପର୍କକୁ,

ନୂଆ ଜୀବନର ନୂଆ ଘରଟିର, 

ବାରିବାକୁ ସେ ନୂଆ ମହକକୁ ।

ବାପ ଘର କଥା ରହି ଯାଏ ସବୁ,

ପଡଇ ତାଲା, ସ୍ମୃତି ସିନ୍ଦୁକରେ

ନୁଆ ସଂସାରଟେ ଗଢିବାକୁ ଯେବେ,

ବୋହୂଟିଏ ପଶେ ତା' ଶାଶୁଘରେ I 

ନୂଆ ଯୁଗଟିଏ ହୋଇବ ଆରମ୍ଭ, 

ନୂଆ ବୋହୂଟି ଶୁଣାଏ ସମ୍ବାଦ, 

ଏରୁଣ୍ଡି ବନ୍ଧକୁ ପାରି କରି ଯେବେ 

ଆଗକୁ ମାଡ଼େ ଅଳତାର ପାଦ I 

ନୂଆ ଅଗଣାରେ ଚଉଁରା ମୂଳରେ 

ଶୁଭିବ ତା'ର ପାଉଁଜିର ସ୍ଵର,

ତାହା ହାତେ ଜାଳି ଗୁଆ ଘିଅ ଦୀପ,

କରିବ ବନ୍ଦନା ପ୍ରତି ସନ୍ଧ୍ୟାର I 

ନୂଆ ପ୍ରଭାତରେ ନୂଆ ଠିକଣାରେ, 

ନୂଆ ନାମଟି ଶୁଭିବ ତାହାର,

ନୂଆ ରୂପ ନେବ ପୁରୁଣା ଭୁଲିକି,

ରାତିଟିରେ ବଦଳିବ ସଂସାର ।

ଅନ୍ନପୂର୍ଣ୍ଣା ସାଜି ସରସ୍ଵତୀ ସାଜି

ହେବ ପୁଣି ସିଏ ପ୍ରିୟ ଶାଶୁର,

ନୂଆ ସ୍ଵପ୍ନ ଭରି ନୟନରେ ତା'ର,

ନୂଆ ବୋହୁ ମାଡ଼େ ତା' ଶାଶୁ ଘର I