ଶାଶ୍ୱତ ପ୍ରେମ
ଶାଶ୍ୱତ ପ୍ରେମ
ପ୍ରେମର ସ୍ୱରୂପ ଚିନ୍ତନରୁ ଜାତ
କର୍ମରେ ପ୍ରତିଫଳନ ।
ଅଦୃଶ୍ୟ ରୂପ ତା କେତେ ମନୋରମ
ଜାଣେ ଅନୁଭବୀ ମନ ।୧।
ମାନବର ଉକ୍ତି ସ୍ନେହ ଶ୍ରଦ୍ଧା ଭକ୍ତି
ବିଚରଣ ଆଚରଣ ।
ଦୁଇ ଆତ୍ମା ମନ ହୃଦୟ ମିଳନେ
ପ୍ରେମ ହିଁ ସାର୍ଥକ ଜାଣ ।୨।
ସ୍ଥାନ କାଳ ପାତ୍ରେ ପ୍ରେମ ଅର୍ଥ ଭିନ୍ନ
ବର୍ଣ୍ଣିବା ବହୁତ କଷ୍ଟ ।
କପଟ ହୃଦୟେ କଳୁଷିତ ମନ
ପ୍ରେମକୁ କରଇ ନଷ୍ଟ ।୩।
ସମୟ ଚକ୍ରରେ ଭାଗ୍ୟ ଘୁରୁ ଥାଇ
ସୁଖ ଦୁଖଃ ଅର ଛୁଇଁ ।
ଧନ ଦଉଲତ ଅଖଣ୍ଡ କ୍ଷମତା
କେବେ ନୁହେଁ ଚିରସ୍ଥାୟୀ ।୪।
ଆଜି ଯେ ଅମୀର କାଲି ସେ ଗରିବ
ଜୀବନ ବି କ୍ଷଣସ୍ଥାୟୀ ।
ପ୍ରେମ କାଳଜୟୀ ଅଲିଭା ମଶାଲ
ଚିରକାଳ ଜଳୁଥାଇ ।୫।
ପ୍ରେମ ପାଇଁ ଲୋଡ଼ା ନାହିଁ ଜାତି ଧର୍ମ
ଧନୀ ଦରିଦ୍ରର ଭାବ ।
ସ୍ପର୍ଶ କରେ ନାହିଁ ଇର୍ଷା ହିଂସା ଦ୍ୱେଷ
ଅହଙ୍କାର ପରାଭବ ।୬।
ରୂପ ଯଉବନ କାମିନୀ କାଞ୍ଚନ
ଅଳିକ ସୁଖ ସପନ ।
କାମୁକ ପ୍ରବୃତ୍ତି କୁସଂସ୍କାର ନୀତି
ପ୍ରେମ କରେ ପ୍ରଦୂଷଣ ।୭।
ପରିପୂର୍ଣ୍ଣ ପ୍ରେମ କେବେ ପରଖେନି
ପଣ୍ଡିତ ମୂର୍ଖ ପ୍ରଭେଦ ।
ଉତ୍କର୍ଷ ଭାବନା ଆଦାନ ପ୍ରଦାନେ
ପ୍ରେମ ହୋଇଥାଏ ସିଦ୍ଧ ।୮।
ଦରଦୀ ହୃଦୟ ଉତ୍ତମ ସ୍ଵଭାଵ
ତ୍ୟାଗପୁତ୍ତ ମନୋଭାବ ।
ନିର୍ମଳ ମନରେ ଅନାବିଳ ସ୍ନେହ
ଶାଶ୍ୱତ ପ୍ରେମ ଉଦ୍ଭବ ।୯।
ଶାଶ୍ୱତ ପ୍ରେମରୁ ନିରନ୍ତର ଝରେ
ନୀତି ଆଦର୍ଶ ଓ ତ୍ୟାଗ ।
ଉତ୍କୃଷ୍ଟ ଚିନ୍ତନ ଶ୍ରେଷ୍ଠ ନିଦର୍ଶନ
ନ ଥାଏ ବିଳାସ ଭୋଗ ।୧୦।
ହୃଦୟ କନ୍ଦରେ ଚିରାନନ୍ଦ ପ୍ରେମ
ଅନନ୍ତ ଶାଶ୍ୱତ ହୋଇ ।
ଯୁଗ ଯୁଗାନ୍ତର ଉଜ୍ଜୀବିତ ରହେ
କଳୁଷିତ ହୁଏ ନାହିଁ ।୧୧।