ଶାନ୍ତି

ସ୍ୱାଧୀନତା ଉତ୍ସ , ବିରାମର ଵଶ୍ୟ ,

ସୁଶିକ୍ଷାର ଅବସର ,

ମଉଳିକ ଅଧିକାରର ସତ୍କାର

ଅନ୍ତର ବିକାଶ ଧାର ।

ମନଖୋଲା ଏକ ଛୋଟିଆ ହସରୁ

ଖୁସିର ଅୟମାରମ୍ଭ ,

ବଳୟ ଖେଳାଇ ଏକରୁ ଅନେକ

ବ୍ୟାପେ ଖୁସିର ତରଙ୍ଗ ।

ହସ ଖୁସି ସ୍ନେହ ଶ୍ରଦ୍ଧା ଭାବନାରେ

ପର ହୁଏ ଆପଣାର ,

ସହାନୁଭୂତି ଓ ସୁସହଯୋଗରେ

ଶାନ୍ତିରେ ଝୁମେ ସଂସାର ।

ଶାନ୍ତି ମଣିଷର ଅନ୍ତରେ ନିହିତ

କୁଆଡେ ଖୋଜିବା କାହିଁ ,

ଉତ୍ତମ ଚିନ୍ତନେ, ସୁକର୍ମ କରଣେ

ଆପେ ରହେ ସାଥି ହୋଇ ।

ଏକ ମନ ନେଇ ମୋ ଭଉଣୀ ଭାଇ

ଆଜି ଏ ଶପଥ ନେବା ,

ଘୃଣା, ଭୟ , ହୀନ-ମନ୍ୟତା ଦୂରେଇ

ଶାନ୍ତିରେ ଶକ୍ତି ଭରିବା।