ଶାଳୀ ବନାମ ଘରବାଲି
ଶାଳୀ ବନାମ ଘରବାଲି
ଶାଳୀ ରାହାବାଳି ତିନି ଗାଆଁ ନଈ
ଅଜଣା ତା ଗଭୀରତା ।
ଘରବାଲି ଆମ ଗାଆଁ ନଈ ଧାର
ପାରି ହେବା ନାହିଁ ଚିନ୍ତା ।।
ଶାଳୀ ପ୍ରେମ ଦେଶୀ ମହୁଲି ବୋତଲ
ପିଇବାକୁ ଭାରି ମିଠା ।
ପେଟରେ ପଡିଲେ ମୁଣ୍ଡକୁ ଚଢ଼ିବ
ତଣ୍ଟି ଶୁଖି ହେବ ଅଠା ।।
ଘରମଣୀ ପ୍ରେମ ଦହି ଭାଙ୍ଗ ଲସି
ପାଟିକୁ ସୁଆଦ ଭାରି ।
ଝୁମି ଝୁମି ନିଶା ମେଣ୍ଟୁ ଥିବ ଆଶା
ବରସି ପ୍ରଣୟ ବାରି ।।
ଶାଳୀ ପ୍ରେମ ମାଡ଼ ଅଦିନିଆ ଝଡ
ଅଚାନକ ଆସେ ଧାଇଁ ।
ଘରବାଲି ପ୍ରେମ ମୃଦୁ ସମୀରଣ
ମନ୍ଦ ମନ୍ଦ ବହୁଥାଇ ।।
ଶାଳୀର ପ୍ରଣୟ ପଳାଶ କୁସୁମ
ବାସହୀନ ମନଲୋଭା ।
ଘରଣୀ ପ୍ରଣୟ ସୁବାସିତ ଫୁଲ
ଧବଳ ରଜନିଗନ୍ଧା ।।
ଶାଳୀ ସହେ ନାହିଁ କୋମଳ ଆଘାତ
ସ୍ୱାର୍ଥ ପାଇଁ ଦିଏ ଗାଳି ।
ପତ୍ନୀ ସହି ପାରେ ପଥରର ମାଡ଼
ନକରି ଝଗଡା କଳି ।।
ଶାଳୀ ଯେତେ ସବୁ ପ୍ରମାଣ ବିହୀନ
ନକଲି କାଗଜ ଗାଡି ।
ଧରା ପଡିଗଲେ ଜୋରିମାନା ଦଣ୍ଡ
ପାଖରୁ ପଳାନ୍ତି ଛାଡି ।।
ବିବି ସବୁବେଳେ ଅନୁଜ୍ଞପ୍ତି ପ୍ରାପ୍ତ
ପ୍ରମାଣ ପତର ଗାଡି ।
ନିର୍ଦ୍ୱନ୍ଦରେ ସେହି ଚାଲୁଥିବ ଗଡି
ଯୁଆଡେ ଗଲେ ବି ଚଢି ।।
ଶାଳୀ ପ୍ରେମ ସୁଖ ଅଢେଇ ଦିନିଆ
ଅଦିନ ଭସା ବାଦଲ ।
ପବନ ଯୁଆଡେ ଗତି ସେଇଆଡ଼େ
ପାଏ ଯେଉଁଠାରୁ ମୂଲ ।।
ଘରବାଲି ସୁଖ ଦୁଃଖ ସାଥି ବୋଲି
ନାମ ତାର ଅର୍ଦ୍ଧାଙ୍ଗିନୀ ।
ଶାଳୀ ସ୍ୱାର୍ଥବାଦୀ ସ୍ଵାର୍ଥରେ ସାରଥୀ
ସମ୍ପଦ ବେଳେ ସଙ୍ଗିନୀ ।।
ଘରର ଘରଣୀ ଉର୍ବରିଆ ଜମି
ଲୋଡା ନାହିଁ ସାର ଓଷ ।
ପାଣି ପାଉଥିଲେ ବର୍ଷସାରା ଖାଲି
ବାରମାସି ଫଳ ଚାଷ ।।