ଶାଗୁଣା ବସିଛି ଡେଣାମେଲାଇ
ଶାଗୁଣା ବସିଛି ଡେଣାମେଲାଇ
ଜୁଇରେ ଜଳିଲା କୁନ୍ଦୁଲି ପୀଡିତା
ରାଜ୍ୟ ବିଦ୍ରୋହ ନିଆଁରେ,
ଅଜାଗା ଘା'ରେ କେ ଦେବ ମଲମ
ପୀଡିତା ଭାବେ ସ୍ୱର୍ଗରେ ॥
ଲୁଡୁଗୋଟି ଆଜି ଆଇନି ଶୃଂଖଳ
ଗଡାଇ ଜାଣିଲେ ହେଲା,
ହରତାଳ ଆଜି ରଣ କୁରୁକ୍ଷେତ୍ର
ଶ୍ରୀଖଣ୍ତି ତ କାଳ କଲା ॥
ଚାଲି ଯାଇଛନ୍ତି ସେ ବୀର ପୁଂଗବ
ଆମେ ସବୁ କ୍ରୀତ ଦାସ,
ଅରାଜକତାର ବନ୍ଦୀ ବଳୟରେ
ପୋଖରୀର ରାଜହଂସ ॥
ଶୋଷଣର ନନ୍ଦିଘୋଷ ପରେ ବସି
ଭଣ୍ତାମି ଚକ୍ରବ୍ୟୁହରେ,
ଶୁଭ ଶଂଖ ଫୁଂକି କରନ୍ତି ସାଲିଶି
ଖାଣ୍ଟି ନଡିଆ ତେଲରେ ॥
ଶୁଣିଥିଲା କାନ କୀଚକ ବଳରେ
ବିରାଟ ଥିଲେ ତ ରାଜା,
ସେହି ବଳ ଆଜି କାଳଫାସ ହେଲା
ବୁଝନ୍ତି ନାହିଁ ପରଜା ॥
ବୀର ବୀରାଂଗନା ଏ ଦେଶ ମାଟିରେ
ରଖି ଯାଇଛନ୍ତି ନାମ,
କାପୁରୁଷ ଏଠି ମାଗେ ନାରୀ ମାଂସ
ହୋଇ ତାଂକରି ସନ୍ତାନ ॥
ତାପସ ସାଧକ ଜନମ ଭୂଇଁ ଏ
ଜଗତେ ପଡିଛି ହୁରି,
ଘୋର କଳିକାଳେ ଧର୍ଷଣ ଭୂଇଁ ଯେ
ଜଳ ଜଳ ଦିଶୁଥାଇ ॥
ଅହିଂସା ବଳରେ କଲମ କାଳିରେ
ଇଂରେଜ ଛାଡିଲେ ଦେଶ,
ସେହି କଲମରେ ପୋଛିଦିଅ ଆଜି
ପୀଡିତାର ସ୍ୱର୍ଗବାସ ॥
-------ଗୈାରାଂଗ ଚରଣ ବେଉରା--------
-----ଶିକ୍ଷକ,କୁଲିଆମାଲ ଉଚ୍ଚ ବିଦ୍ୟାଳୟ--------