ସେଦିନ ସଞ୍ଜରେ

ସେଦିନ ସଞ୍ଜରେ ନଈ ଆରପାରେ

ଅସ୍ତାଚଳେ ରବି ଚାହିଁ

କହିଥିଲ ତୁମେ ସଂପ୍ରୀତି ସୋହାଗେ

ପ୍ରତିଶ୍ରୁତିଟିଏ ଦେଇ ll

ତୁମ ଆବେଗରେ ମଧୁର ପ୍ରେମରେ

ବୁଢିଆଣୀ ଜାଲ ସମ

ଛନ୍ଦିଦେଇ ଥିଲ ଛବିଳ କୁଞ୍ଜରେ

ଦେଇ ଚିତ୍ରଲେଖା ନାମ ll

ପ୍ରୀତି ପାରାବାରେ ସୁନୀଳ ସ୍ରୋତରେ

ଟଳ ମଳ ନୌକା ସମ

ନୟନ ଯୁଗଳେ ଉଜାଣି ଯମୁନା

କରୁଥିଲା ମତି ଭ୍ରମ ll

ଶୟନେ ସ୍ୱପନେ ତୁମ ଛବି ଆଙ୍କି

ଲୁହରେ ଲେଖୁଛି ଚିଠି

ଖୋଜୁଛି ତୁମକୁ ଆକୁଳ ଅନ୍ତରେ 

ବିଦଗ୍ଧ ନାୟିକା ସାଜି ll

ସେଇ ଦିନୁ ଆଉ ପାଇନି ତୁମକୁ

ତୁମ ରୂପ ଦରଶନ

ଚତୁର୍ପାର୍ଶ୍ୱେ ଖାଲି ଅନୁଭବିଛି ମୁଁ 

ଦିବ୍ୟ ତୁମ ସମ୍ମୋହନ ll

କୁହ ବନ୍ଧୁ ତୁମେ କିପାଇଁ ରହିଛ

ଦୂରେ ବହୁ ଦୂରେ ସାଥୀ

ତୁମରି ସ୍ମୃତିର ସତେଜ ସୁଗନ୍ଧ

ବାଣ୍ଟୁଛି ଅଭୁଲା ପ୍ରୀତି ll

ନିଦ ଭରା ମୋର ନୟନ ଯୁଗଳେ

ଦେଲ ତୁମେ ସ୍ବପ୍ନ ଭରି

ସେ ସ୍ବପ୍ନ ଚିନ୍ତନେ ନିତି ପ୍ରତିକ୍ଷଣେ

ତୁମକୁ ମୁଁ ହୁଏ ଝୁରି ll

ଫେରିଆସ ବନ୍ଧୁ ମୋ ପ୍ରୀତି ବନ୍ଧନେ

ଫଗୁଣର ଫଗୁ ନେଇ

ଅଲଭ୍ୟ ଆଶାର କୋଣାରକ ଗଢ଼ି

ମିଳନ ସଙ୍ଗୀତ ଗାଇ ll