ସେ ପଥେ ମିଳନ୍ତି ଈଶ୍ୱର
ସେ ପଥେ ମିଳନ୍ତି ଈଶ୍ୱର
କରିବନି ତୁମେ ଗର୍ବ ଅହଂକାର
ନିଜ ବାହୁବଳ ଧନର
ନିଜର ଭାବନା ସବୁ ଠିକ୍ ଭାବି
ଦେଖାଅନି ଗର୍ବ ଅହଂକାର||
ଭଲ କର୍ମ କଲେ ପ୍ରଶଂସା ଲଭିବ
ମନ୍ଦ କର୍ମେ ନିନ୍ଦା ପ୍ରଚାର
ନିଜର ମର୍ଯ୍ୟାଦା କଥା ମନେ ରଖି
କରିଚାଲ ସବୁ କର୍ମର ||
ପରର ମର୍ଯ୍ୟାଦା ପ୍ରତି ସଚେତନ
ରହିଥିବ ସବୁ କ୍ଷେତ୍ରେ
ପର ଦୁଃଖ ଦେଖି ହସିବନି କେବେ
ଲୋତକ ଝରାଅ ନେତ୍ରେ ||
ଭାଗ୍ୟ ନ ହୋଇବି ଅଭିମାନୀ ପ୍ରିୟା
କରେ ଯେହ୍ନେ ଅଭିମାନ,
ବୁଦ୍ଧି ଓ ବିବେକ ଲୁହା ନହୋଇ ବି
ଲାଗଇ କଳଙ୍କ ଚିହ୍ନ,
ଶରୀର ନହୋଇ ଆଘାତ ଲଭଇ
ତୁମର ଆତ୍ମସମ୍ମାନ,
ପାଣିପାଗ ନୁହେଁ ସମାଜେମଣିଷ
ତଥାପି ବଦଳେ ଜାଣ ||
ଯେଉଁ ପଥ ସତ୍ୟ ଶାନ୍ତି ଅହିଂସାର
ସେପଥେ ଥାଆନ୍ତି ଈଶ୍ୱର,
ଯେଉଁ ପଥ ଅଟେ ମାନବିକତାର
ସେପଥେ ଥାଆନ୍ତି ଈଶ୍ୱର,
ପଥ ସ୍ନେହ ପ୍ରୀତି ଭଲପାଇବାର
ସେ ପଥେ ମିଳନ୍ତି ଈଶ୍ୱର||
ଯେଉଁ ପଥ ଅସତ୍ୟ ଅବିଶ୍ଵାସର
ଦିବାଲୋକେ ଘୋର ଅନ୍ଧାର,
ଯେଉଁ ପଥ ଅଟେ ସ୍ୱାର୍ଥପରତାର
ସେ ପଥେ ନଥା'ନ୍ତି ଈଶ୍ୱର ||
ଯେଉଁ ପଥେ ଘୋର ଅମା ଅନ୍ଧକାର
ଦର୍ଶନ ମିଳେନି ଛାଇର
ସୃଷ୍ଟି ଯାହାଙ୍କର ଉଜ୍ଜ୍ୱଳ ଆଲୋକେ
ନାପସନ୍ଦ ତାଙ୍କ ଅନ୍ଧକାର
ସତ୍ୟ ଧର୍ମ ନ୍ୟାୟ ଅହିଂସା ମାର୍ଗରେ
ଥିଲେ ହିଁ ମିଳନ୍ତି ଈଶ୍ୱର ||