ସଦୟ ହେବ ମହାବାହୁ

ପୂଣ୍ୟ ଖୋଜିହେଲେ ପାପ ମିଳେ ଏଠି

ଭଲ ଖୋଜିହେଲେ ଭୁଲ ମିଳଇ

ଏମିତି ଦୁନିଆ ଦେଖାଇଲୁ ମୋତେ

ମିଛ ଭିନ୍ନ ସତ ଟିକିଏ ନାହିଁ I

ତାହେଲେ କାହିଁକି ହିସାବ କରିବି

କେତେ ପାପ କଲି କେତେ ବା ପୂଣ୍ୟ

ସତ ମିଛ ଯେବେ ହିସାବ କରୁଛି

ଶେଷରେ କେବଳ ମିଳୁଛି ଶୂନ୍ୟ I

ଶରୀରରେ ମୋର ପାପ ପଙ୍କ ସବୁ

ବୋଳି ହେଉଛି ମୁଁ ଜୀବନ ସାରା

କଥା କହିଲେ ମୁଁ ମିଛ ହିଁ କହୁଛି

ସତ ମୋ ତୁଣ୍ଡରେ ଦେଉନି ଧରା I

କପଟଛନ୍ଦରେ ମନ ମୋ ଭରିଛି

ଭଲ କଥା କିଛି ଶୁଣିନି କାନେ

ଏ ମାୟା ସଂସାର ବାଇଆ କରିଛି

ତୁମ ନାମ ତୁଣ୍ଡେ ଧରିନି ଦିନେ I

ଭଜନ କୀର୍ତ୍ତନ ସବୁ ପ୍ରହସନ

ତୁମ ନାମେ ଏଠି ଚାଲେ ବେପାର

ଏ କି ଲୀଳା ଖେଳା ଲଗାଇଛ ତୁମେ

କହିଦିଅ ଥରେ ହେ ମାୟାଧର I

ଏ ଘୋର କଳିରେ ନାମ ଏକା ସାର

ନାମର ଶକତି ଅବର୍ଣ୍ଣନୀୟ

ତୁମ ନାମଧରି ଯିବି ମୁହିଁ ତରି

ତୁମେ ଯଦି ଟିକେ ହେବ ସଦୟ I